На 9.4.2013 година се одржа редовна седница на Комитетот за оперативна монетарна политика, на којашто беа разгледани податоците за банкарскиот сектор заклучно со февруари 2013 година, движењата на меѓународните и домашните финансиски пазари во март 2013 година, најновите макроекономски податоци за домашната економија и ликвидноста во банкарскиот систем

На 9.4.2013 година се одржа редовна седница на Комитетот за оперативна монетарна политика, на којашто беа разгледани податоците за банкарскиот сектор заклучно со февруари 2013 година, движењата на меѓународните и домашните финансиски пазари во март 2013 година, најновите макроекономски податоци за домашната економија и ликвидноста во банкарскиот систем.

На глобален план, во текот на март се зголеми неизвесноста во однос на состојбите во евро-зоната. Реалните податоци од почетокот на годината не даваат прецизна слика за економската активност во евро-зоната. Финансиската криза во Кипар и начинот на нејзиното разрешување повторно ги покрена прашањата за способноста на носителите на политиките во евро-зоната за брзо и ефикасно справување со проблемите во рамките на монетарната унија.

Ликвидноста во банкарскиот систем во земјата се одржува на релативно високо и стабилно ниво, при што банките активно ги користат монетарните инструменти. На домашниот пазар на пари, и натаму се забележува тргување со депозити на подолги рочности (до 3 месеци) и тргување со хартии од вредност, што упатува на релативно висока доверба помеѓу пазарните учесници. На девизниот пазар се забележани вообичаените сезонски движења кај понудата и побарувачката за девизи.

Економските и финансиските услови во домашната економија, како и изворите на ризици за монетарната политика не се значително променети во однос на периодот од последната аукција на благајнички записи. Имено, трендот на релативно поволни движења кај инфлацијата и девизните резерви продолжи. Податоците за инфлацијата и за март покажуваат понатамошно забавување на растот на потрошувачките цени, при што инфлацијата во текот на целиот квартал се движи под проектираното ниво. Овие движења укажуваат на постојано намалување на инфлациските ризици, во услови на помали притисоци од увозните цени.  Промените во девизните резерви од почетокот на годината се позитивни и се во рамки на проекциите. Притоа показателите за адекватност упатуваат на комфорно ниво на девизните резерви, доволно за неутрализирање на евентуалните неповолни шокови. Показателите за економската активност за изминатата година покажаа малку понеповолна состојба во реалниот сектор од оценетата. Показателите за активноста за првото тримесечје се позитивни и даваат сигнали за поповолни движења во однос на претходниот квартал во согласност со проекцијата. Сепак, се очекува дека ова закрепнување нема да биде доволно силно за да го затвори негативниот производствен јаз и да создаде поголеми нерамнотежи во економијата. Бавното закрепнување на реалниот сектор се пренесува и врз кредитниот пазар на банките. И покрај солидниот и стабилен раст на депозитниот потенцијал, кредитната активност и понатаму е умерена. Искористеноста на депозитната база за кредитирање се намалува, при изразени склоности за вложување во нискоризични ликвидни инструменти, што доведува до натамошен раст на ликвидноста на банките. Овие движења ја покажуваат воздржаноста на банките за преземање поголеми ризици во услови на неизвесен амбиент.  

Наспроти поволните движења гледано од монетарен аспект, одредени ризици за монетарната политика и понатаму постојат. И покрај помалите инфлациски ризици, гледано преку вкупната инфлација, базичната инфлација и понатаму е висока и упатува на можни поголеми пренесени ефекти од растот на цените на храната и енергијата врз останатите цени во економијата. Воедно, во последниот период дојде до повторно зголемување на неизвесноста за состојбите во евро-зоната, што значи можно влошување на надворешното окружување и потенцирање на ризиците за надворешната позиција на економијата. 

Имајќи ги предвид најновите пазарни, макроекономски и финансиски показатели, на седницата на Комитетот беше одлучено максималната каматна стапка на благајничките записи да се задржи на нивото од 3,5%, а на аукцијата да се понудат благајнички записи на ниво на достасаниот износ (24.020 милиони денари). НБРМ ќе продолжи внимателно да ги следи идните макроекономски движења и евентуалното остварување на ризиците. Доколку ризиците останат во контролирани рамки и ако поволните трендови кај клучните показатели продолжат и понатаму, монетарната политика соодветно ќе се приспособи. 

Кабинет на гувернерот