Макроекономски податоци објавени во август укажаа дека економијата на евро-зоната излезе од рецесија во вториот квартал од 2013 година, а посочија и на можен умерен економски раст и во втората половина од годината. Од другата страна на Атлантскиот Океан, американската економија е во подобра состојба и закрепнува со побрза динамика, но одредени макроекономски показатели упатуваат на неизвесност во однос на самоодржливоста на економскиот раст.

Најновите движења во домашната економија не упатуваат на поголеми промени во амбиентот за спроведување на монетарната политика во однос на претходните оцени, дадени во август. Така, годишниот раст на инфлацијата продолжи да забавува и во август изнесуваше 2,8%. Инфлациските остварувања целосно се во рамки на проекциите, а последните оцени и понатаму укажуваат на урамнотежени ризици околу проектираната просечна инфлација од 2,8% за 2013 година. Показателите за економската активност упатуваат на раст на БДП за второто тримесечје, условен од растот на индустриската и градежната активност, иако со нешто поумерена динамика од претходното тримесечје. Според првичните податоци за кредитните текови, во август има месечна стагнација на кредитната активност, при пад на кредитирањето на корпоративниот сектор и понатамошен раст на кредитната поддршка на секторот „население“. Се оценува дека ризиците околу проекцијата на кредитите остануваат претежно надолни, во услови кога бавното и неизвесно економско закрепнување креира поголема воздржаност на банките за кредитирање. Негативен ефект врз кредитниот раст имаат и конзервативните стратегии на некои банкарски групации коишто со свои ќерки се присутни на домашниот пазар. Месечниот раст на депозитите во банкарскиот систем забрза во август, но и понатаму депозитниот потенцијал се зголемува со побавна динамика од очекуваната.

Ликвидноста на банкарскиот систем во Република Македонија во август се зголеми под влијание на автономните фактори, во најголем дел заради реализираните девизни интервенции. Во склад со сезонските движења, но и под влијание на позитивните економски текови, во третиот квартал на 2013 година на девизниот пазар беше зголемена понудата на девизи, што услови подобрување на девизните позиции на банките, интервенции во насока на откуп на девизи од страна на Народната банка и дополнителна акумулација на девизните резерви. За надминување на ликвидносните флуктуации, банките активно ги користеа монетарните инструменти, а на пазарот на депозити, меѓубанкарските трансакции беа со рочност до 1 месец.

Во септември 2013 година во сила стапија последните измени кај инструментот „задолжителна резерва“ донесени од страна на Народната банка (на седницата на Советот во јули). Истите мерки обезбедуваат натамошна поддршка на растот на штедењето во домашна валута и стимулирање на прилив на странски капитал во домашната економија, како дополнителен извор за финансирање на банкарскиот систем. Овие измени претставуваат континуитет на мерките коишто ги презема Народната банка кај инструментот „задолжителна резерва“ заради олабавување на монетарните услови и создавање простор за зголемување на кредитната поддршка на приватниот сектор.

Имајќи ги предвид најновите макроекономски и пазарни показатели, на седницата на Комитетот за оперативна монетарна политика беше одлучено дека каматната стапка на основниот инструмент, благајничките записи, е поставена на соодветно и ниско ниво. Следствено, истата се задржа на 3,25%, а на аукцијата беше одлучено да се понудат благајнички записи на ниво на достасаниот износ (од 25.500 милиони денари).

НБРМ ќе продолжи внимателно да ги следи идните макроекономски движења и евентуалното остварување на ризиците и соодветно на тоа, ќе ја приспособува монетарната политика.

Кабинет на гувернерот