ОБРАЌАЊЕ НА ГУВЕРНЕРОТ ДИМИТАР БОГОВ ПО ПОВОД ЗАТВОРАЊЕТО НА ИПА-ПРОЕКТОТ „АНАЛИЗА НА ПОТРЕБИТЕ НА НБРМ“, СКОПЈЕ, 10.7.2013 ГОДИНА

Почитуван г. Асмусен, член на Извршниот одбор на ЕЦБ,

почитуван г. Орав, амбасадор на ЕУ во Република Македонија,

дами и господа, почитувани гости, претставници на медиумите,

Ми претставува посебно задоволство да ве известам дека денеска на состанокот на Управниот комитет на заедничкиот проект со Европската централна банка за Анализа на потребите на НБРМ во процесот на пристапување кон Европскиот систем на централни банки и Евросистемот, финансиран од ЕУ, го усвоивме финалниот извештај Анализа на потребите на НБРМ (Needs Analysis Report). Со тоа можам да констатирам дека Проектот, чиешто спроведување траеше девет месеци, заврши успешно.

Успехот, пред сѐ, се должи на посветеноста на Проектот и добрата соработка помеѓу сите учесници во текот на изминатите девет месеци. Затоа, дозволете ми најпрво да ја искажам својата благодарност до ЕЦБ, со која заеднички ја инициравме и ја остваривме оваа соработка, до националните централни банки од Европскиот систем на централни банки и нивните експерти коишто се вклучија и беа непосредно ангажирани во остварувањето на Проектот, како и до Делегацијата на ЕУ во нашата земја за поддршката во текот на целото времетраење на Проектот и секако за обезбедената финансиска помош со којашто се овозможи неговото остварување. Воедно би сакал да ја истакнам и придобивката за НБРМ од извонредната соработка со претставниците од ЕЦБ и националните централни банки од Евросистемот.

Имајќи ја предвид улогата на централната банка во процесот на пристапување на земјата кон ЕУ, Народната банка на Република Македонија го започна овој проект со цел да се подготви за идното членство во Европскиот систем на централни банки и Евросистемот. Патот на земјата кон ЕУ е процес којшто бара од нас изградба на силни и ефикасни институции. Овој проект го има за цел токму тоа - зацврстувањето на институционалниот капацитет на Народната банка и усогласувањето на работењето со стандардите за националните централни банки во ЕУ, по пат на ревидирање на тековната законска рамка, усвојување и спроведување нови политики и практики и обука на кадарот. 

Спроведувањето на европските стандарди и најдобри практики во работењето на НБРМ не претставува цел самата по себе. Тоа ќе придонесе за зајакнување на улогата на Народната банка во обезбедувањето на ценовната стабилност и стабилноста и ефикасноста на финансискиот систем во земјата, како и зајакнување на капацитетот на Народната банка во справувањето со предизвиците што ѝ престојат на патот на пристапувањето на Република Македонија во ЕУ.

Дозволете ми накусо да се осврнам на резултатите и значењето на Проектот во однос на натамошното работење на Народната банка.

Како прва и најзначајна придобивка од Проектот се соодветните наоди на експертите за постојните јазови и препораките за нивно надминување со временска рамка и потребните ресурси. Во таа насока, Извештајот за анализата на потребите на НБРМ ќе претставува основа за стратегиското планирање на Народната банка и за поставувањето на идната стратегија за приклучување кон Европскиот систем на централните банки и Евросистемот. 

Притоа, со посебно задоволство можам да истакнам дека во Извештајот, НБРМ е оценета како професионална, независна, технички ефикасна и стратегиски ориентирана институција, а во одредени области од централнобанкарското работење е утврдено дека веќе работи во согласност со стандардите на ЕУ и на ЕСЦБ. Исто така, со задоволство можам да констатирам дека одредени препораки што беа дадени за времетраењето на Проектот веќе се спроведени, што ме охрабрува да ја потврдам нашата силна посветеност во поглед на исполнувањето и применувањето на препораките дадени во Извештајот. 

Би сакал да ве уверам дека во зависност од природата на препораките, некои ќе бидат спроведени во кус временски период, додека, пак, за други ќе биде потребно повеќе време, како и дополнителни технички и човечки ресурси и секако дополнителна техничка помош во однос на искуството и знаењето од ЕЦБ и националните централни банки од ЕУ.

Токму создавањето можности за натамошна меѓусебна соработка го сметам за втората значајна придобивка којашто Народната банка ја имаше од спроведувањето на овој проект. Имено, во Проектот беа вклучени голем број експерти од различни области на централнобанкарското работење од ЕЦБ и од 11 централни банки од Европскиот систем на централни банки. Во изминативе девет месеци тие имаа интензивна комуникација и соработка со своите колеги во НБРМ и остварија вкупно 16 оценски мисии, во чии рамки несебично го пренесуваа сето свое искуство и знаење. Спроведувањето на Проектот уште повеќе придонесе за зголемување на свеста и познавањата на вработените во НБРМ за соодветните прописи, стандарди и практики на ЕУ коишто се применуваат од страна на современите централни банки. 

Оттука, посебно сакам да ја истакнам идната перспектива на нашата заемна соработка, којашто се надевам дека ќе продолжи во истиот дух и уште повеќе ќе се продлабочи. 

Дозволете ми на крајот уште еднаш да го истакнам моето задоволство и да им оддадам признание на постојниот програмски координатор од ЕЦБ и на сите вклучени експерти од ЕЦБ, од Европскиот систем на централни банки и од Народната банка на Република Македонија за успешното спроведување на проектот. 

Благодарам.