Почитувани гости,

Дами и господа,

Ми претставува голема чест и задоволство да ве поздравам на Меѓународната конференција на високо ниво за монетарна политика и управување со финансиски средства. Конференцијата претставува заедничка заложба на Народната банка на Република Македонија и Комитетот за преобразување на Бретон Вудс. Среќни сме за ова партнерство, чиишто резултати се вградени во програмата на Конференцијата којашто е богата и со теми коишто ќе бидат опфатени и со истакнати говорници коишто ќе ги водат дискусиите.

Насловот на Конференцијата е „Нова нормала? Глобална економска експанзија, динамика на инфлација, финансиска стабилност и значењето за управувањето со финансиски средства во меѓународни рамки" и претставува настан организиран токму навреме за да се осврне на лекциите научени од глобалната финансиска криза, да ја процени моменталната состојба на глобалната економија и нејзините идни перспективи и да даде совети за предизвиците со кои се соочуваат централните банки и оние коишто управуваат со финансиските средства.

Оваа деценија претставува период на вистински предизвик за донесување политики и управување со финансиски средства. Светот се соочува со финансиски, економски и должнички кризи. Големите централни банки користат неконвенционални политики и ултраприспособливи монетарни политики. Она што навистина го одбележа периодот по кризата беше реформата на финансискиот систем, особено на банкарската индустрија, и преиспитувањето на мандатот на централните банки во однос на финансиската стабилност. Како резултат на финансиските турбуленции, ниските приноси и дивергентните монетарни политики во САД и во ЕУ, лицата коишто управуваат со финансиските средства почнаа да инвестираат во различни инструменти и оптимално да балансираат меѓу ризикот и повратот. Глобалното закрепнување неодамна зајакна, но сѐ уште има загриженост во однос на неговата одржливост. Ниската продуктивност и натаму ги замаглува изгледите за идниот економски просперитет и раст, а инфлацијата остана ниска во многу земји. Покрај тоа, постојат геополитички ризици, ризици од прекумерна задолженост и отпорност на финансискиот сектор кон потенцијални нови шокови.

Сите овие исклучително важни прашања за носителите на политиките и лицата коишто управуваат со финансиски средства ќе бидат дел од нашата агенда за денес. Програмата ќе започне со воведен говор, проследен со четири сесии. Во првата сесијата ќе се опфатат прашања поврзани со тековната и идната конјунктура на глобалната економија, монетарната политика и иднината на каматните стапки. Втората сесијата ќе се осврне на прашањата за финансиската стабилност и колку сме подготвени да се справиме со потенцијалните турбуленции. Во третата сесија, претставниците на централните банки и друштвата за управување со финансиски средства ќе ги изнесат своите ставови за стратегиите за ефикасно намалување на ризикот, и како друштвата за управување со финансиски средства треба да се подготват за „новата нормала“ кон усогласување на монетарните политики. Четвртата сесијата ќе се фокусира на Југоисточна Европа и перспективите на регионот за европска интеграција и раст.

Особено сум среќен што имаме истакнати говорници и одлични панелисти коишто ќе се осврнат на темите на Конференцијата.

Дозволете ми да изразам искрена благодарност до г. Беноа Кере, член на Извршниот одбор на ЕЦБ и г. Тао Џанг, заменик главен директор на ММФ, што нѐ почестија со своето присуство денес.

Задоволство ми е да ви ги претставам и г. Луиз Авазу Переира да Силва, заменик главен директор на БИС и гувернерот Гудмундсон, коишто, исто така, ќе имаат свое обраќање.

Би сакал да ја изразам мојата благодарност и до сите други истакнати панелисти на денешните сесии - заменик-гувернери, претставници на меѓународни организации, глобални банки и инвеститори и други почесни говорници, за нивниот придонес во настанот.

Исто така, ми претставува чест што г. Драган Тевдовски, министер за финансии на Република Македонија и г. Владислав Горанов, министер за финансии на Република Бугарија, ќе дадат свои размислувања за перспективите на регионот на ЈИЕ.

Со нетрпение ги очекувам вашите разговори и на сите присутни им посакувам пријатен и исполнет ден на Конференцијата. Ви благодарам на сите што дојдовте, особено ако се земе предвид дека многумина од вас мораа да патуваат долго за да дојдат во Скопје. Се надевам дека сите ќе уживате во агендата и Конференцијата ќе ја сметате за продуктивна и корисна.

На крајот, би сакал да им се заблагодарам на сите оние коишто напорно работеа на организацијата на овој настан. Мојата најискрена благодарност и почит ја испраќам до нашиот коорганизатор Марк Узан, извршен директор на Комитетот за преобразување на Бретон Вудс. Работата на Марк е добро позната и призната од светската економска заедница. Со мисија за промовирање на стабилноста на меѓународната финансиска архитектура и монетарниот систем, тој има организирано околу 100 семинари ширум светот кои го олеснуваат дијалогот помеѓу високи функционери, академици и учесници на пазарот. Имав чест да присуствувам на некои од неговите семинари и само можам да дадам комплимент за неговата стручност и страст со кои одлично ги извршува сите активности во секое време.

Марк, ми претставува вистинско задоволство и привилегија што работам со вас. Се надевам дека ќе ја повториме оваа соработка. Повелете на бина.

Ви благодарам!