Склучен е меморандум за соработка, унапредена е улогата и проширен е составот на Комитетот за финансиска стабилност и формирани се два поткомитета.

Скопје, 4 април 2020 година

Финансиските регулатори ја зајакнуваат соработката во следењето на состојбите во финансискиот систем. Во околностите коишто ги наметнува корона-кризата, со максимална посветеност на секој регулатор во рамки на неговите надлежности, координирано ќе се одржува финансиската стабилност. Ова е пораката којашто ја упатија гувернерката на Народната банка, Анита Ангеловска-Бежоска, министерката за финансии, Нина Ангеловска, претседателката на Комисијата за хартии од вредност, Нора Алити, претседателот на Советот на експерти на Агенцијата за супервизија на осигурување, Крсте Шајноски, претседателот на Советот на експерти на Агенцијата за супервизија на капитално финансирано пензиско осигурување, Максуд Али и директорот на Фондот за осигурување депозити, Борче Хаџиев. Тие склучија нов Меморандум за меѓуинституционална соработка заради одржување на финансиската стабилност, изготвуван во текот на изминатите неколку месеци, во согласност со препораките на Меѓународниот монетарен фонд и Светската банка.

Меморандумот се склучува за да може и натаму навремено и ефикасно да се идентификуваат системските ризици и да се преземаат активности заради спречување и намалување на нивното влијание врз финансискиот систем преку поголема меѓусебна координираност на регулаторите. Со активностите коишто се предвидени со Меморандумот, ќе биде дополнително зајакната отпорноста на нашиот финансиски систем на шокови, а надлежните институции ќе бидат уште поподготвени за управување со предизвиците.

Меѓу другото, согласно со одредбите на Меморандумот се унапредува улогата и се проширува составот на Комитетот за финансиска стабилност, по примерот на Европскиот одбор за системски ризици. Досега Комитетот го сочинуваа само претставници на Народната банка и на Министерството за финансии. Отсега, во работата на Комитетот ќе учествуваат сите регулатори на финансискиот систем, а негов национален координатор ќе биде гувернерката на Народната банка, Анита Ангеловска-Бежоска. Во рамки на Комитетот ќе функционираат и два поткомитетa, како оперативни тела – Поткомитетот за следење на системските ризици и предлагање макропрудентни мерки и Поткомитетот за подготовка за управување со финансиска криза. Заради остварување на поставените цели, давање препораки и преземање соодветни активности, преку Комитетот координирано ќе се следат анализите за состојбите во финансискиот систем, како и регулативата којашто може да има влијание врз финансиската стабилност.

Во натамошниот период посветено ќе се работи на зајакнување на макропрудентната рамка, заради што ќе се унапредува регулативата, со што едновремено се следат и препораките од Програмата за проценка на финансискиот сектор на Меѓународниот монетарен фонд и Светската банка, спроведена во 2017 и 2018 година.