Скопје, 31 мај 2020 година

Во најновото неделно издание на престижниот магазин „Глобал капитал“ е објавен осврт на гувернерката на Народната банка, Анита Ангеловска-Бежоска, за предизвиците од корона-кризата за македонската економија.  

Ангеловска-Бежоска најпрво се осврнува на карактеристиките на нашата економија, при што меѓу другото ги посочува подобрувањето на нејзината надворешна позиција во изминатата деценија и растот на девизниот потенцијал, поради што сега може да се спроведува олабавена монетарна политика за ублажување на ефектите од кризата со којашто се соочуваме. Како особено значаен го издвојува процесот на интеграција во глобалните синџири на производство, со што се подобрува извозната база, се засилуваат странските директни инвестиции во секторот на разменливи добра и постепено се намалува трговскиот дефицит.

Истовремено, гувернерката ја истакнува важноста на постојаното јакнење на стабилноста на банкарскиот систем преку зајакнување на регулаторната и супервизорската рамка, што е од исклучително значење за соодветно справување со актуелниот шок. Во овој контекст, како што посочува гувернерката, Народната банка овозможи поголема регулаторна флексибилност заради поголема кредитна поддршка на сите оние кои се кредитоспособни, а се погодени од корона-кризата.

Во завршницата на објавата во „Глобал капитал“, Ангеловска-Бежоска порачува дека јасната лекција од корона-кризата е дека и во моментите кога сме фокусирани на „гаснење на пожарот“, не треба да заборавиме на структурните пречки коишто треба да се отстранат за да се зголеми долгорочниот потенцијал на економијата, да се намали ранливоста и следствено на тоа, да се зголеми просторот на политиките за подобро справување со идни шокови.  

„Глобал капитал“ е еден од најреферентните извори на информации за глобалните пазари на капитал. Освртот на гувернерката на Народната банка е објавен во рамките на серијалот текстови од носителите на политики посветен на актуелните предизвици од корона-кризата.