Nga intervista për TV24

Shkup, 31 mars 2020  

„Sistemi ynë bankar mbetet i shëndoshë dhe stabil. Ai ka kapacitet të merret me goditjet e shkaktuara nga gjendja e koronavirusit.“ - theksoi guvernatorja e Bankës Popullore, Anita Angelovska-Bezhoska në intervistën e saj për Televizionin 24. Të dhënat e fundit në dispozicion që datojnë nga fillimi i këtij viti, siç theksoi jo, konfirmojnë kapitalizimin, likuiditetin dhe cilësinë e lartë të aktivit të cilin sistemi ynë e ka në dispozicion.  

„Mjaftueshmëria e kapitalit është afër 17% - nivel i cili është më i lartë se në vitin 2008 kur ekonomia u godit nga një tronditje e madhe.  Pjesa e aktivit likuid në totalin e aktivit është 27%, e cila është gjithashtu më e lartë krahasuar me periudhën para krizës ekonomike globale. Cilësia e aktivit të bankave, që është një përcaktues i rëndësishëm i aktivitetit të kredisë, është shumë e qëndrueshme. Kjo shihet qartë përmes nivelit të kredive me probleme i cili momentalisht është afër 4,9% nga totali i ekspozimeve të kredisë. E gjithë kjo tregon se sistemi ynë bankar ka një kapacitet të qëndrueshëm të cilin mund të ofrojë mbështetjen e nevojshme për popullsinë dhe sektorin e korporatave.“ - tha Angelovska-Bezhoska.

Gjatë intervistës, guvernatorja foli edhe për masat të cilat Banka Popullore i ndërmori gjatë javëve të kaluara, me ç’rast në veçanti iu referua ndryshimeve rregullatore me të cilat mundësohet lehtësimi i barrës financiare të huamarrësve. Siç theksoi ajo, para se të miratohen ndryshimet, u kryen një sërë analizash dhe stres testesh, me qëllim vlerësimin e hollësishëm të kapacitetit të sistemit bankar. „Në të njëjtën kohë, kujdesemi për të ruajtur stabilitetin financiar dhe për të mundësuar mbështetje për sektorin e korporatave dhe popullsinë.“ - theksoi Angelovksa-Bezhoska.

Me zbritjen e normës së interesit të bonove të bankës qendrore, siç theksoi guvernatorja, lehtësohen edhe më tej kushtet financiare me anë të të cilave miratohen kreditë për ndërmarrjet dhe popullsinë. „Në drejtim të mbështetjes së aktivitetit të kredisë dhe aktivizimin e masave jostandarde drejtuar sektorëve të ekonomisë maqedonase të cilët do të preken më shumë nga kriza e koronës - kreditimin e këtyre sektorëve e stimulojmë me atë që shuma e kredisë do të zbritet nga kryegjëja për llogaritjen e rezervës së detyruar të bankave.“ - tha ajo.

Gjatë intervistës, Angelovska-Bezhoska rikujtoi se denari është dhe do të mbetet stabil dhe se nuk do të ketë ndryshime në nivelin e kursit të tij të këmbimit. „Strategjia monetare për ruajtjen e një kursi fiks të këmbimit të valutës vendase në raport me euron është optimale për ekonominë tonë dhe pikërisht kursi i këmbimit mundëson mbajtjen e një inflacioni të ulët dhe të qëndrueshëm në ekonominë tonë, dhe bashkë me të sigurimin e stabilitetit makroekonomik dhe financiar.“ - th ajo.

„Për vite me radhë, banka jonë qendrore ka mbajtur një nivel të lartë të rezervave valutore, gjë që është një garanci për stabilitetin e kursit të këmbimit të valutës vendase. Momentalisht, siç tashmë kemi njoftuar, niveli i rezervave valutore është diçka mbi tre miliardë euro. Sipas të gjithë treguesve ndërkombëtarë, ky nivel tregon mjaftueshmërinë e rezervave dhe kapacitet për trajtimin e çfarëdolloj goditjeje në ekonominë tonë.“ - tha guvernatorja, me ç’rast rikujtoi se në vitin 2008, kur ekonomia përjetoji goditje të papritura, niveli i rezervave ishte shumë më i ulët.

Në fund të intervistës, Angelovska-Bezhoska tha se Banka Popullore tashmë aktivisht punon mbi parashikimet e fundit makroekonomike, ku do të merren parasysh të gjithë efektet e pritura nga situata e re me pandeminë e Kovid-19, si mbi ekonominë vendase, ashtu edhe mbi mjedisin e jashtëm.

 Video materialin mund ta gjeni në:  https://youtu.be/XFupbIzxA2U