Shkup, 31 korrik 2023 

Pandemia dhe periudha pas saj sollën shumë sfida, por sektori bankar ruajti dhe forcoi ende më shumë stabilitetin e funskionimit. Sipas të dhënave të fundit, likuiditeti i bankave është në nivele të kënaqshme, aftësia paguese është përmirësuar dhe është më e larta në gjashtëmbëdhjetë vitet e fundit, ndërsa cilësia e portofolit të kredisë ka mbetur me një normë të ulët të kredive me probleme. Kjo u theksua në takimin e guvernatorës së Bankës Popullore, Anita Angellovska-Bezhoska dhe zëvendësguvernatorëve Ana Mitreska dhe Fadil Bajrami, me shefin e ri për çështje ekonomike në Ambasadën e Shteteve të Bashkuara të Amerikës në vend, Dejvid Majers dhe Jordan Damçevski, ekonomist i lartë në Ambasadë.

Banka Popullore në këtë kishte një kontribut të rëndësishëm duke zbatuar me sukses kornizën rregullative dhe duke zbatuar politika dhe masa makroprudente që në mënyrë sistematike dhe të vazhdueshme e kanë forcuar qëndrueshmërinë e bankave. Për të forcuar edhe më tej qëndrueshmërinë e sistemit bankar ndaj rreziqeve, në një periudhë njëvjeçare, Banka Popullore ndërhyri tre herë në normën e shtresës mbrojtëse kundërciklike të kapitalit. Ajo miratoi gjithashtu masa të tjera makroprudente për të ruajtur cilësinë e huamarrësve.

Në takim u diskutua edhe për Ligjin e ri për ndërhyrje të jashtëzakonshme – një zgjidhje sistematike për forcimin e mëtejshëm të stabilitetit financiar. Në përputhje me ligjin, Banka Popullore do të bëhet autoriteti kompetent për ndërhyrje të jashtëzakonshme të bankave dhe synimi është sigurim i veprimit të shpejtë dhe efikas, nëse ndonjë bankë përballet me probleme serioze, duke ruajtur funksionet e saj që konsiderohen veçanërisht të rëndësishme për ekonominë dhe duke shmangur ndikim të rëndësishëm negativ në stabilitetin financiar. Ndërhyrja e jashtëzakonshme ligjore e propozuar zbaton direktivën e re evropiane për rikuperimin dhe zgjidhjen e problemeve me institucionet kreditore dhe kompanitë e investimeve, e cila konfirmon përpjekjet e vazhdueshme për respektimin e standardeve më të larta ndërkombëtare.

Në fund të takimit u konfirmua bashkëpunimi i mirë tradicional dhe të pranishmit shprehën angazhimin e tyre për zgjerimin dhe thellimin e tij.