Shkup, 30 dhjetor 2024

Në pritje të një viti më të mirë ekonomikisht gjatë 2025-tës, në të cilin inflacioni do të vazhdonte të stabilizohej dhe rritja do të përshpejtohej, le të kthehemi shkurtimisht në vitin të cilit po i numërojmë ditët dhe të kujtojmë sfidat dhe rezultatet në të. Çdo rishikim i kujdesshëm i hapave, sfidave dhe sukseseve tona është një udhërrëfyes drejt një të ardhmeje më të suksesshme. 

Në vitin 2024, me sukses kemi ruajtur stabilitetin makroekonomik, duke përfshirë edhe stabilitetin e denarit, me rritjen e rezervave devizore në nivel dyzet për qind mbi nivelin para pandemisë. Ruajtja e qëndrueshme e kursit të këmbimit të monedhës vendase në kohë të mbushura me sfida është një tregues i qartë i kapaciteteve të bankës sonë qendrore dhe i aksioneve tona në besueshmërinë e politikave që drejtojmë.

Rezultatet e politikës monetare në vitin 2024 mund të shihen edhe nëpërmjet stabilizimit të mëtejshëm të inflacionit, i cili pas normës mesatare prej 9,4% në vitin 2023, është ulur në 3,4% në dhjetë muajt e parë të këtij viti dhe presim një ngadalësim të mëtejshëm gradual në vitin e ardhshëm. Nëse mbahen këto prirje të favorshme në inflacion dhe në tregun valutor, pa realizimin e rreziqeve më të mëdha, mund të pritet një zbutje e mëtejshme gradual dhe e kujdesshme e politikës së normave të interesit nga Banka Popullore edhe vitin e ardhshëm.

Falë udhëheqjes së kujdesshme të politikës monetare dhe zbatimit të mëtejshëm të masave makroprudenciale nga banka qendrore, krahas uljes së inflacionit, është forcuar edhe stabiliteti financiar. Edhe në periudhën e krizës, sektori bankar ishte shtylla e stabilitetit ku mbështetej ekonomia dhe biznesi, ndërsa qëndrueshmëria e tij u forcua më tej përmes masave të ndërmarra nga Banka Popullore. Në të njëjtën kohë, raporti i mjaftueshmërisë së kapitalit arriti në 19%, që është niveli më i lartë në shtatëmbëdhjetë vitet e fundit, ndërsa pjesëmarrja e kredive me probleme në total është në nivel historikisht të ulët, 3%. Rritja e depozitave nga qytetarët dhe kompanitë përshpejtoi dhe mundësoi mbajtjen e rritjes së kredisë, ndërsa është veçanërisht e rëndësishme që depozitat në denarë dhe ato afatgjata shënuan rritje dyshifrore, që flet qartë për besim në sistemin bankar dhe në monedhën vendase.

Vlen të përmendet edhe dorëzimi i kërkesës formale për anëtarësimin e vendit në Zonën e Vetme të Pagesave në Euro (SEPA) nga Banka Popullore gjatë vitit të kaluar, i cili është një hap historik për hyrjen në sistemet europiane të pagesave dhe afrimin me Bashkimi Europian. Përfitimet për qytetarët dhe ekonominë nga anëtarësimi në SEPA janë të shumëfishta dhe shkurtimisht përfshijnë pagesa ndërkufitare më të shpejta, më efikase dhe më të lira.

Në vitin e ardhshëm, nuk ka dyshim se ruajtja e stabilitetit makroekonomik do të vazhdojë të jetë prioriteti ynë, pasi është një parakusht kryesor për rritje më të lartë ekonomike. Banka Popullore do të angazhohet gjithashtu për të mbështetur transformimin strukturor të ekonomisë sonë. Tranzicioni i gjelbër dhe digjitalizimi nuk janë vetëm prioritete moderne, por janë drejtime strategjike që hapin rrugën drejt rritjes së qëndrueshme, vendeve të reja të punës dhe konkurrencës më të mirë.

Banka Popullore do të vazhdojë të mbështesë në mënyrë aktive financimin e gjelbër, duke nxitur kështu përgjegjësinë mjedisore në aktivitetet ekonomike. Në të njëjtën kohë, me mbështetjen e sektorit fintek dhe inovacioneve digjitale, ne krijojmë mundësi të reja për modernizimin e shërbimeve financiare, qasje më të mirë për qytetarët dhe një nxitje për rritjen e sipërmarrjes.

Pas nesh po lëmë një vit nga i cili morëm mësime të rëndësishme dhe bëmë hapa të rëndësishëm përpara. Një vit i ri është përpara nesh, i cili ofron mundësi të reja. Nëpërmjet politikave ekonomike të besueshme, ne do të përfitojmë nga mundësitë, duke menaxhuar me kujdes rreziqet që do të vazhdojnë të ekzistojnë. Së bashku, me politika të përshtatshme makroekonomike dhe strukturore, ne mund të ndërtojmë një ekonomi të qëndrueshme, gjithëpërfshirëse dhe të gatshme për të përballuar sfidat e së nesërmes.

Të gjithë qytetarëve ju uroj lumturi, shëndet dhe suksese në Vitin e Ri 2025! Banka Popullore është një partner i besueshëm në krijimin e një të ardhmeje më të mirë për të gjithë ne.