Shkup, 29 gusht 2023
Guvernatorja Angellovska-Bezhoska, së bashku me guvernatorët e Austrisë, Gjermanisë dhe Danimarkës, mori pjesë në panel-diskutimin "Ndikimi i shtrëngimit të politikës monetare në stabilitetin financiar" në Forumin Europian "Europa e guximshme 2023" që u mbajt në Austri. Në kohë të presioneve afatgjata inflacioniste, është e padiskutueshme që prioritet kyç i bankave qendrore duhet të jetë stabilizimi i inflacionit, që nevojitet pozicionimi shtrënguar monetar. Që shtrëngimi i politikës monetare të mos krijojë rreziqe për stabilitetin financiar, është thelbësore të ndërmerren masa makro dhe mikroprudenciale për ruajtjen dhe forcimin e mëtejshëm të stabilitetit të sistemit bankar. Me marrjen e masave paraprake, para se të fillojë shtrëngimi monetar ose gjatë shtrëngimit, forcohet kapaciteti kapital dhe likuiditeti i bankave dhe ofrohet hapësirë më e madhe për bankat qendrore në luftën kundër inflacionit.
Në diskutimin e saj, guvernatorja Angellovska-Bezhoska theksoi se shikuar historikisht, pozicionimimonetar global paraqet shtrëngimin më të sinkronizuar dhe më të fuqishëm të politikës monetare në pesë dekadat e fundit, me synim të ankorimit të pritjeve inflacioniste dhe të zvogëlohet norma e inflacionit. Por, normat më të larta të interesit mund ta rrisin rrezikun e kredisë dhe të shkaktojnë rritjen e kredive me probleme. Deri më tani ajo nuk po ndodh, duke pasur parasysh se në Europë dhe në rajonin e EQJL-së ato mbahen në nivelin nën 4%, që është nivel dukshëm më i ulët në krahasim me periudhën para pandemisë. Tek ne kreditë me probleme janë akoma më të ulëta - 2.8%.
Gjithashtu, si rezultat i reformës rregullatore globale, e cila u krye nga ne, përmes një numri të madh të masave të ndërmarra nga Banka Popullore, ndjeshëm janë forcuar kapaciteti kapital dhe likuiditeti i sistemit bankar për të zbutur rreziqet e mundshme. Mjaftueshmëria e kapitalit është më e lartë në dekadën e fundit. Vitin e kaluar për herë të parë u prezantua shtresa mbrojtëse kundërciklike e kapitalit, dhe këtë vit për herë të parë u vendosën masa makroprudenciale që synojnë cilësinë e kërkesës për kredi. Megjithatë, guvernatorja theksoi se është veçanërisht e rëndësishme të vazhdohet me forcimin e mëtejshëm të kornizës makroprudenciale dhe mikroprudenciale, si dhe forcimin e bashkëpunimit me institucionet kompetente europiane, sepse në rajon pjesa më e madhe e aktiveve të sistemit bankar është në pronësi të grupeve bankare nga Bashkimi Europian. Nga këtu, mundësia e përfshirjes më të madhe në kolegjet mbikëqyrëse dhe kolegjet e ndërhyrjes së jashtëzakonshme të cilat i organizojnë institucionet europiane, do të ishte me rëndësi të madhe në shkëmbimin e informatave dhe ndërmarrjen e aktiviteteve konsistente dhe të koordinuara.
Në fund të evenimentit, guvernatorja zhvilloi takim dhe pati diskutim produktiv për sfidat e ekonomisë sonë me bursistët nga vendi ynë që morën pjesë në Forum.
Forumi Europian në Alpbah, Austri, i cili filloi të mbahej në vitin 1949, është hapësirë për të bashkuar të rinjtë nga Europa dhe e gjithë bota me mendjet më inovative nga politika, biznesi, shoqëria civile, kultura dhe shkenca për të stimuluar idetë për Europë të fuqishme dhe demokratike. Me këtë komunitet të larmishëm, ndërgjeneratash dhe ndërdisiplinor, Forumi ndikon në pjesëmarrësit kryesorë nga kontinenti europian për të lehtësuar mësimin dhe vendimet e tyre.