Shkup, 29 korrik 2023 

Denari mbetet stabil, kurse rezervat valutore janë në nivelin e duhur. Politika monetare të cilën e udhëheq Banka Popullore si dhe ulja e presioneve nga çmimet e importuara kanë ndikuar në ngadalësimin e inflacionit i cili pritet edhe më tej të ulet. Kreditë me probleme në bilancin e bankave vazhdojnë të jenë në nivel të ulët, ndërkohë që mjaftueshmëria e kapitalit në sektorin bankar është solide dhe e qëndrueshme. Këto janë disa nga vlerësimet e agjencisë së vlerësimit të kredisë “Standard & Poor’s”, në kuadër të raportit që konfirmon vlerësimin e kredisë së vendit BB- me perspektivë të qëndrueshme.

Në raport theksohen pritshmëritë e Agjencisë për ruajtjen e mëtejshme të stabilitetit të kursit të këmbimit, pavarësisht sfidave nga mjedisi i jashtëm. Në të njëjtën kohë, në raport theksohet rritja e rezervave valutore, të cilat në qershor të vitit 2023 shënuan 4.2 miliardë euro. Ndërhyrjet e Bankës Popullore në tregun e brendshëm valutor, si dhe shfrytëzimi i burimeve të jashtme për financimin e nevojave të politikës fiskale, janë paraqitur si faktorë rritjeje. Sipas pritshmërive të “Standard & Poor's”, rezervat valutore janë ende të qëndrueshme dhe do të mbeten në nivelin e duhur.

Sipas “Standard & Poor's” pas arritjes së kulmit në fund të vitit të kaluar, inflacionin filloi gradualisht të ngadalësohet dhe të ulet në 9.3% në muajin qershor. Pritet që ky trend të vazhdojë, si rezultat i uljes së presioneve inflacioniste të importit dhe shtrëngimit të politikës monetare nga ana e Bankës Popullore, e cila është në përputhje me politikën e udhëhequr nga Banka Qendrore Evropiane.

Raporti shqyrton situatën aktuale në sistemin bankar, me theks në besueshmërinë dhe qëndrueshmërinë e tij, e cila mund të shihet nga niveli i ulët i kredive me probleme prej vetëm 2.8%, si dhe nga niveli solid dhe i qëndrueshëm i mjaftueshmërisë së kapitalit të bankave prej 18%. Në të njëjtën kohë, theksohen edhe masat e ndërmarra nga Banka Popullore për nxitjen e kursimeve në monedhën vendase dhe uljen e euroizimit në sistemin financiar, nëpërmjet ndryshimeve në nivelin e rezervës së detyrueshme të bankave.