Shkup, 28 dhjetor 2021 

Kursi i këmbimit ka qenë i qëndrueshëm prej vitesh dhe do të jetë i qëndrueshëm edhe në të ardhmen. Garancia për këtë është niveli i lartë i rezervave valutore, por edhe shumë instrumente të tjera në dispozicion të bankës qendrore që nuk do të hezitojë t'i përdorë në mbrojtje të kursit të këmbimit, tha guvernatorja e Bankës Popullore, Anita Angelovska-Bezhoska në intervistën për TV 24. Ajo thekson se kursi stabil i denarit është strategjia më optimale e përshtatshme për ekonominë tonë.

“Ky nuk është vetëm qëndrim i Bankës Popullore. Ky është qëndrim edhe i institucioneve financiare ndërkombëtare. Kohët e fundit, Fondi Monetar Ndërkombëtar e bëri të qartë qëndrimin e tij, duke deklaruar se kursi i denarit është i qëndrueshëm, se stabiliteti i kursit të këmbimit është spiranca kryesore për stabilitetin e përgjithshëm makroekonomik dhe se banka qendrore ka nivel adekuat të rezervave valutore për të mbrojtur stabilitetin e kursit”, tha guvernatorja.

Guvernatorja vuri në dukje se stabiliteti i kursit të këmbimit është komponent kyçe e stabilitetit të përgjithshëm makroekonomik në vendin tonë dhe është një e mirë publike nga e cila përfiton çdo qytetar. Ajo theksoi se një nga sfidat me të cilat ballafaqohet banka qendrore janë spekulimet, të cilat fatkeqësisht janë paraqitur në disa raste. Ajo gjithashtu theksoi se çdo qytetar ka përgjegjësi shoqërore ndaj të mirave publike dhe përhapja e spekulimeve nuk është në interes të askujt, përkundrazi është në dëm të qytetarëve.

Guvernatorja theksoi se instrumenti kryesor që mbron stabilitetin e kursit të këmbimit - rezervat valutore, mbahen në nivelet më të larta të të gjitha kohërave.

“Sipas të dhënave të fundit të disponueshme, rezervat valutore arrijnë në 3.5 miliardë euro, ose rreth 30 për qind e PBB-së. Sa për ilustrim, në periudhën 2008-2009, gjegjësisht në krizën financiare globale, të cilën e përballuam me sukses dhe kur u ruajt stabiliteti i denarit, niveli i rezervave valutore ishte 1.4 miliardë euro, ndërsa pjesëmarrja relative e tyre në prodhimin e brendshëm bruto ishte rreth 22%. “Të gjithë treguesit sipas të cilëve vlerësohet përshtatshmëria e nivelit të rezervave valutore tregojnë një nivel plotësisht të përshtatshëm”, tha Angelovska-Bezhoska.

Guvernatorja shtoi se në vitin 2020, kur filloi pandemia, Banka Popullore arriti të nisë një iniciativë rajonale në të gjithë Ballkanin Perëndimor, për herë të parë në histori, për të siguruar akses në likuiditetin valutor nga Banka Qendrore Evropiane. Kjo do të thotë se nëse kemi nevojë për likuiditet valutor shtesë, mund t'i drejtohemi Bankës Qendrore Evropiane dhe të marrim mbështetje. Megjithatë, nuk ka nevojë për këtë, theksoi guvernatorja, sepse kemi nivelin e nevojshëm të rezervave valutore.