Shkup, 24 prill 2023 

Në mbledhjen e mbajtur më 19 prill 2023, Komiteti për mbështetje të zhvillimit të inovacioneve në sistemin financiar në Republikën e Maqedonisë së Veriut (Komiteti i sektorit fintech) miratoi Strategjinë për rregullatorët në sektorin fintech, e cila ka për qëllim të ofrojë kushte për mbështetjen e inovacioneve në fushën e financave, duke pasur parasysh mbrojtjen e konsumatorëve dhe investitorëve si dhe stabilitetin e sistemit financiar.

Strategjia për rregullatorët e sektorit fintech ka të bëjë me aspektet rregullatore që lidhen me transformimin e sistemit financiar të udhëhequr nga sektori fintech. Në atë përfshihen rekomandimet për rregullatorët ku për zbatimin e tyre të suksesshëm, është e domosdoshme qasje e koordinuar e rregullatorëve dhe mekanizëm i duhur për mbikëqyrjen e zbatimit të rekomandimeve nga Strategjia për rregullatorët e sektorit fintech.

Dokumenti strategjik i miratuar trason rrugën për shfrytëzimin e përfitimeve të zhvillimit të inovacioneve financiare, të cilat janë të shumëfishta. Sipas Raportit të Grupit të ekspertëve të BE-së për pengesat rregullatore lidhur me inovacionet financiare (ROFIEG), zhvillimi i inovacioneve në sferën e financave mund të sjellë çmime më të ulëta të shërbimeve financiare, gamë më të gjerë produktesh dhe shërbimesh, zgjedhje më të madhe të konsumatorëve dhe kompanive, mundësi më të mira për financim, rregullativë më efektive dhe pajtueshmëri me praktikat më të mira ndërkombëtare.

Strategjia fintech për rregullatorët e sektorit  fintech do të kontribuojë në fleksibilitetin dhe hapjen ndaj ndryshimeve në kornizën rregullatore në mënyrë që të nxisë konkurrencën në interes të konsumatorëve dhe rritjen e mëtutjeshme të rezistencës dhe stabilitetin e sistemit financiar. Përdorimi i zgjidhjeve inovative fintech do të çojë në efikasitet më të lartë operacional, menaxhim më të mirë të rrezikut dhe pajtueshmëri më të mirë rregullatore të institucioneve financiare.

Strategjia e miratuar për rregullatorët e sektorit fintech është pjesa e parë e Strategjisë Kombëtare e sektorit fintech e cila u shqyrtua në mbledhjen e Komitetit të sektorit fintech. Bëhet fjalë për përfundimin e aktiviteteve të ndërmarra nga Banka Popullore në vitet e kaluara të zbatuara përmes projektit EFSE të nisur në vitin 2018, të synuar në vendosjen e themeleve për transformimin e sistemit financiar në RMV të udhëhequr nga sektori fintech. Në vitin 2019, në Bankën Popullore u formua grupi punues për teknologjitë financiare me ekspertë nga njësi të ndryshme organizative, e cila e krijoi Portën e Inovacioneve, si platformë për komunikim me komunitetin inovativ të biznesit. Në tetor 2020, u zbatua anketë për hulumtim gjithëpërfshirës të ekosistemit në të cilin morën pjesë 220 të anketuar nga segmente të ndryshme të ekosistemit, ku 90% prej tyre konfirmuan nevojën për transformimin e sistemit financiar në RMV, të udhëhequr nga sektori fintech. Njëkohësisht, Banka Popullore dhe Ministria e Financave u përfshinë në mënyrë aktive në procesin e harmonizimit të rregullativës për shërbimet e pagesave dhe sistemet e pagesave, me të cilën gjithashtu promovohen inovacionet teknologjike në fushën e financave. Me iniciativën e Bankës Popullore dhe me qëllim të krijimit të kushteve për të mbështetur zhvillimin e sektorit fintech, rregullatorët financiar - Banka Popullore, Ministria e Financave, Komisioni i Letrave me Vlerë, Agjencia për Mbikëqyrje të Financimit Kapital të Sigurimit Pensional dhe Agjencia për Mbikëqyrjen e Sigurimit, vitin e kaluar kanë lidhur Memorandum për Bashkëpunim, me të cilin është vendosur sistem përmes të cilit rregullatorët veprojnë në mënyrë të koordinuar, secili në kompetencën e vet, në raport me zbatimin e Strategjisë për rregullatorët e sektorit fintech.