Shkup, 23 nëntor 2024

Edukimi financiar është baza për një të ardhme të suksesshme dhe faktor kyç për zhvillimin personal. Në botën ku jetojmë, ku kushtet ekonomike ndryshojnë vazhdimisht, është veçanërisht e rëndësishme që brezat e rinj të jenë të përgatitur dhe të informuar mirë. Kur individët kuptojnë se si funksionojnë instrumentet dhe konceptet financiare, ata mund të menaxhojnë më mirë burimet e tyre. Këto janë mesazhet që përcjellën guvernatorja e Bankës Popullore, Anita Angellovska-Bezhoska dhe ministrja e Financave, Gordana Dimitrieska-Koçoska, në ndarjen e çmimeve nga Konkursi për vepra artistike dhe letrare për arsimin fillor dhe të mesëm me rastin e Ditës Ndërkombëtare të Kursimeve - 31 Tetor. 

“Në përgjithësi dihet se pa kursim nuk ka investim. Kjo do të thotë të investosh në shëndetësi, arsim, rrugë, siguri më të mirë, pra investim në gjithçka që është e rëndësishme për një të ardhme më të mirë për individin, por edhe për të gjithë ekonominë. Është kënaqësi të shohësh se të rinjtë që morën pjesë në Konkurs tashmë kanë njohuritë e tyre për nevojat e kursimit, ndërgjegjësimin për zhvillimin e shpejtë të financave, veçanërisht të shërbimeve digjitale, si dhe rreziqet që ato mbartin. Gjeneratat e reja jetojnë në një epokë të re digjitale, në të cilën kanë qasje në informacione të shumta, por edhe mundësi të shumta për mashtrim. Mënyra më e mirë për t'i mbrojtur ata nga këto rreziqe është përmes edukimit të duhur”, tha guvernatorja Angellovska-Bezhoska.

“Kishte punime vërtet cilësore. Rreth 700 punime kanë ardhur nga i gjithë vendi. Ngjarja kthehet në një traditë të mrekullueshme dhe është një frymëzim për të motivuar veten dhe të tjerët për të vënë financat në radhë të parë, në mënyrë që së bashku të mund të ndërtojmë një të ardhme më të mirë financiare për veten dhe brezat tanë të ardhshëm. Edukimi financiar është një nga mjetet më të fuqishme që kemi në dispozicion për të siguruar mundësitë tona financiare dhe për të arritur qëllimet tona financiare duke mbrojtur veten nga rreziqet financiare. Prandaj është e rëndësishme që ne të vendosim edukimin financiar në qendër të shkollave tona, komuniteteve tona dhe jetës sonë dhe që në moshë të re të mundësojmë përvetësimin e njohurive dhe aftësive për të ndërtuar sjellje të përgjegjshme financiare në çdo fazë të jetës. Është një proces afatgjatë, efektet e të cilit nuk janë menjëherë të dukshme, prandaj le të jemi të vetëdijshëm për potencialin tonë financiar dhe ta shfrytëzojmë me mençuri”, tha ministrja e Financave Gordana Dimitrieska-Koçoska.

Në Konkurs arritën rreth 700 punime, të cilat dallohen për cilësinë, kreativitetin dhe stilin autentik të të shprehurit, si dhe njohjen e temës së kursimit, rëndësinë e edukimit financiar, avantazhet dhe rreziqet e shërbimeve financiare digjitale.