Shkup, 19 mars 2023

„Sinjal i mirë është se rritja e inflacionit po ngadalësohet. Në muajin shkurt, rritja vjetore e çmimeve është më e ulët rreth tre pikë përqindje se rritja më e fortë që ishte matur në muajin tetor, dhe ky ritëm përshtatjeje është i ngjashëm me atë në eurozonë. Dinamika me të cilën lëviz inflacioni është e ngjashme edhe me pritjet në ciklin e fundit të projeksioneve të Bankës Popullore, sipas të cilave ajo është e projektuar në 8-9% në bazë vjetore. Skenari për këto projeksione bazohet në supozimet për ulje të mëtejshme të çmimeve botërore të energentëve dhe ushqimit, stabilizim gradual i pritjeve inflacioniste, që tashmë edhe po ndodh, ndërsa shtrëngimi i kushteve financiare gjithashtu duhet të veprojë në atë pjesë të indeksit të çmimeve që është i ndjeshëm ndaj ndryshimeve të kërkesës. Nëse nuk ka goditje të paparashikuara në periudhën e ardhshme, duhet të shohim stabilizim të inflacionit”, thotë zëvendësguvernatorja Ana Mitreska në intervistë për “Bllumberg Adria”.

Zëvendësguvernatorja Mitreska iu referua edhe politikës monetare të cilën e udhëheqin dy bankat qendrore të rëndësishme globalisht - Rezervat Federale të SHBA-së dhe Banka Qendrore Evropiane. BQE javën e kaluar, sipas njoftimeve, ka rrit normat e interesit me 0.5 pikë përqindje shtesë, ndërsa FED ka theksuar kohët e fundit nevojën e mundshme për politikë monetare më të shtrënguar, për shkak të kushteve më të shtrënguara të punës dhe ngadalësimit ende të pamjaftueshëm të inflacionit. Sa i përket rrugës së ardhshme, ajo theksoi se do të varet nga vlerësimet më të reja të kushteve ekonomike dhe financiare në këto ekonomi. Nëse zhvillimet e fundit në tregjet e jashtme financiare do të kenë  reflektim në pritjet për treguesit ekonomikë, ndërsa me atë edhe të vendosjes monetare të këtyre dy bankave qendrore dhe në çfarë mase, do të shihet në periudhën e ardhshme.

„Lëvizjet dhe ndryshimet në politikën monetare të Bankës Popullore do të varen nga inflacioni, por edhe nga tregu devizor, duke marrë parasysh atë që funksionojmë në kushte të regjimit të kursit fiks devizor, i cili është spiranca nominale dhe baza e stabilitetit të përgjithshëm të ekonomisë sonë. Në të dy frontet po shohim stabilizim të caktuar, por rreziqet ende ekzistojnë. Kuptohet se edhe sjellja e Bankës Qendrore Evropiane do të ketë ndikim të caktuar në politikën tonë të interesit. Është e nevojshme që të gjitha informatat dhe vlerësimet e reja të disponueshme për ekonominë vendase dhe mjedisin e jashtëm  të sistematizohen dhe ato do të paraqesin bazën për hapat e ardhshëm në politikën monetare”, thotë zëvendësguvernatorja Mitreska.