Shkup, 17 qershor 2021

Jetojmë në një kohë të revolucionit teknologjik që po ndryshon rrënjësisht mënyrën e jetesës dhe punës. Vlerësohet se sipas shkallës, vëllimit dhe kompleksitetit, transformimi do të jetë më i ndryshëm nga gjithçka që ka përjetuar njerëzimi deri më tani. Megjithëse ende nuk mund të vlerësojmë me saktësi se si do të zhvillohet ky proces, është e qartë se përgjigja ndaj këtij transformimi të ri duhet të jetë gjithëpërfshirëse, duke përfshirë të gjitha palët e interesit në shoqërinë tonë, si nga sektori publik ashtu edhe ai privat. Sipas të dhënave nga raporti i fundit i Forumit Ekonomik Botëror, duhet të përqendrohemi në nevojën për të transformuar njohuritë dhe aftësitë e fuqisë punëtore, e cila duhet të jetë në një hap me transformimin e të gjithë ekonomisë drejt dixhitalizimit të saj më të madh. Ky proces u bë edhe më i theksuar që nga goditja e pandemisë me të cilën u ballafaqua ekonomia globale.

Kjo u theksua nga guverntorja e Bankës Popullore, Anita Angelovska-Bezhoska, në fillim të fjalës së saj në uebinarin me temë „Sfidat për arsimin e lartë nga fusha e ekonomisë në periudhën pas Kovid-19“, të organizuar nga Katedra për Ekonomi e Fakultetit Ekonomik - Shkup të Universitetit „Sv. Kiril i Metodi“ në Shkup.

Ajo mbështeti nismën e Fakultetit lidhur me përpjekjet për të siguruar proces të inovacionit të përmbajtjeve arsimore nga aspekti i njohurive profesionale dhe kualifikimeve të studentëve, në përputhje me lëndët dhe përmbajtjet e leksioneve të cilat i mësojnë studentët nga fusha e ekonomisë. 

„Banka Popullore, si një punëdhënës aktual dhe i ardhshëm i studentëve nga Fakulteti Ekonomike, zhvilloi një anketë të brendshme për të vlerësuar gatishmërinë e stafit të ri për t’u përgjigjur kërkesave të vendeve të punës, veçanërisht duke pasur parasysh ndryshimet të cilat ndodhin në veprimtarinë e bankës qendrore në dekadën e fundit dhe për të cilat besojmë se do të jenë më të shpejta në dekadën që vjen.“ - njoftoi guvernatorja.

Në bazë të rezultateve nga anketa, Angelovska-Bezhoska vuri në dukje disa dimensione lidhur me aftësitë të cilat është e pëlqyeshme t’i fitojnë studentët gjatë studimeve, që do të ishte me rëndësi të madhe për përshtatjen e tyre më të shpejtë dhe më efektive ndaj nevojave të vendeve të punës në Bankën Popullore:

• Njohja e bazave të metodave dhe modeleve të aplikuara ekonometrike - përmes aktivitetit teorik dhe në veçanti praktik të projekteve gjatë studimeve. Ajo adresoi veçmas aspektet që janë të rëndësishme për politikën dhe kërkimet monetare, në fushën e stabilitetit financiar dhe në pjesën e menaxhimit të rezervave valutore dhe zbatimit të instrumenteve monetare në procesin e zbatimit të politikës monetare.
• Të mësuarit dhe përvetësimi i aftësisë për të punuar me një ose më shumë programe ekonometrike (Matlab, STATA, E-views), si dhe puna me baza të mëdha dhe komplekse të dhënash, që kërkojnë njohuri nga fusha e shkencës së të dhënave (data science);
• Njohja e bazave të statistikës monetare, duke pasur parasysh që miratimi i politikave të përshtatshme monetare dhe makroekonomike mbështeten në disponueshmërinë e të dhënave dhe treguesve statistikorë cilësorë.
• Njohuri dhe kualifikime profesionale që janë një parakusht për kryerjen e funksionit mbikëqyrës në monitorimin e punës së bankave, si dhe ofruesve tjerë të shërbimeve financiare - njohuri të hollësishme për proceset e punës së bankave komerciale dhe aktivitetet financiare që kryhen nga ato, standardet themelore mbikëqyrëse, si dhe një punë më e madhe praktike e fituar përmes studimeve të lëndës „Veprimtaria bankare“ të kryer në punën e bankave.  

Në fjalën e saj, Angelovska-Bezhoska iu referua edhe të dhënave nga raporti i Forumit Ekonomik Botëror të titulluar „Vende e punës të së ardhmes“, të cilat ndër të tjera tregojnë se me zbatimin e përshpejtuar të teknologjisë së re, në korniza globale, do të hapen 97 milionë vende të reja pune, kryesisht në fushën e inteligjencës artificiale, analizën e të dhënave, veçanërisht në bazat e gjera të të dhënave, marketingun dixhital, zhvillimin e biznesit, sigurinë informatike dhe sferën fintech, dhe po ashtu do të ketë një reduktim të vendeve aktuale të punës. Kjo, siç theksoi guvernatorja, tregon për nevojën e përgatitjes së një stafi për „vendet e punës të së ardhmes“ prej ku rrjedhin edhe përpjekjet për propozime konstruktive në uebinarin e sotëm.

Në ngjarjen elektronike mori pjesë edhe ministri i Financave, Fatmir Besimi, nënkryetari i Odës Ekonomike të Maqedonisë së Veriut, Zoran Jovanovski dhe kryetari i Komisionit për Mbrojtje të Konkurrencës, Vladimir Naumovski.

Banka Popullore dhe Fakulteti Ekonomik - Shkup i Universitetit „Sv. Kiril i Metodi“ në Shkup, në këtë periudhë, forcojnë bashkëpunimin dhe investimet e përbashkëta për të siguruar parakushte për një produktivitet më të madh në ekonomi, gjë që është e arritshme vetëm me staf cilësor të përgatitur për sfidat e kohës së re.