Shkup, 14 dhjetor 2024 

U miratua Programi i punës për vitin 2025 - në qendër të vëmendjes janë qëllimet kryesore dhe aktivitetet zhvillimore për ngritjen e mëtejshme të kapaciteteve institucionale të Bankës Popullore

Këshilli i Bankës Popullore miratoi Programin e punës për vitin 2025, me të cilin do të fillohet zbatimi i ciklit të ri vjetor të aktiviteteve dhe projekteve në përputhje me kompetencat ligjore dhe fushat strategjike të parapara për tre vitet e ardhshme me Planin e ri Strategjik të Bankës Popullore. Monitorimi i vazhdueshëm i trendeve dhe praktikave moderne është ende në qendër të vëmendjes së Bankës Popullore në kuadër të aktiviteteve të rregullta lidhur me kompetencat ligjore në fushat e zbatimit të politikës monetare, stabilitetit të sistemit bankar, menaxhimit të rezervave valutore, kërkimet ekonomike dhe statistikat, efikasiteti i sistemit të pagesave dhe menaxhimit me para të gatshme. Proceset dhe projektet e rregullta të punës të planifikuara për vitin 2025 mundësojnë integrimin e ndryshimeve në punë me qëllim të rritjes së efikasitetit, cilësisë, transparencës dhe besueshmërisë, respektimit të kërkesave të reja ligjore dhe standardeve ndërkombëtare.

Krahas aktiviteteve të rregullta, Programi i punës për vitin 2025 parasheh aktivitete zhvillimore dhe projekte në të cilat Banka Popullore do të punojë në mënyrë proaktive në pesë fusha strategjike. Në kuadër të fushës së parë strategjike, Banka Popullore është ende e përkushtuar për avancimin e funksioneve të bankës qendrore për ruajtjen e stabilitetit dhe ngritjen e një banke qendrore moderne. Njëkohësisht, theksi është vendosur në përmirësimin e kornizës për udhëheqjen e politikës monetare, kapaciteteve kërkimore, menaxhimin e rezervave valutore dhe forcimin e stabilitetit dhe elasticitetit të sistemit bankar, mbikëqyrjen, ndërhyrjen e jashtëzakonshme mbi banka dhe mbrojtjen e konsumatorëve. Banka Popullore do të vazhdojë të nxisë inovacionet në sistemet e pagesave dhe shërbimet e pagesave në të ardhmen, duke përdorur përparimin e vazhdueshëm teknologjik për të përmirësuar efikasitetin dhe sigurinë në transaksionet financiare. Vëmendje e veçantë do t'i kushtohet aktiviteteve që duhet t'i mundësojnë vendit tonë anëtarësimin në Zonën e Vetëm të Pagesave në Euro (SEPA), e cila do të na çonte në pagesa më të lira, më të shpejta dhe më të përshtatshme për kompanitë dhe qytetarët.

Në kuadër të fushës së dytë strategjike, vëmendje e veçantë i kushtohet inovacionit dhe zhvillimit të aftësive të reja për të mbështetur transformimin digjital, riorganizimin e proceseve të punës, rritjen e efikasitetit operacional dhe avancimin e njohurive për menaxhimin e të dhënave dhe aftësive analitike, duke shfrytëzuar fuqinë e teknologjive më moderne. Banka Popullore do të vazhdojë të punojë në disa projekte në fushën e statistikave, siç është zhvillimi i sistemit të integruar për raportim statistikor dhe mbikëqyrës dhe magazinimin e të dhënave, zhvillimi i sistemit të integruar të kontabilitetit, digjitalizimi dhe automatizimi i operacioneve të thesarit, si dhe zhvillimi i teknologjisë së informacionit nëpërmjet të cilit banka qendrore do të vazhdojë të transformohet në një institucion modern dhe të shkathët.

Aktivitetet programore në fushën e tretë strategjike theksojnë përkushtimin e vazhdueshëm për promovimin e transparencës dhe bashkëpunimit. Një nga vendet kyçe në këtë fushë zë edukimi financiar, që synon rritjen e njohurive financiare dhe përfshirjen e popullsisë, për të cilën janë planifikuar shumë aktivitete. Programi i punës parasheh edhe rishikimin e Strategjisë për edukim financiar dhe përfshirje financiare të Republikës së Maqedonisë së Veriut për periudhën 2021 - 2025, e cila do të bëhet përmes përfshirjes, përkatësisht konsultimit me të gjitha palët e interesuara.

Në bazë të motos për tre vitet e ardhshme, Banka Popullore në fushën e katërt strategjike do të ndërmarrë aktivitete për ndërtimin e një ekonomie të qëndrueshme dhe të gjelbër, rritjen e ndërgjegjësimit për ndryshimet klimatike dhe forcimin e kapaciteteve të veta për t'u përballur me sfidat që dalin nga këto ndryshime. Programi parasheh aktivitete përmes të cilave vazhdon zbatimi i Planit Afatmesëm të aktiviteteve të Bankës Popullore në fushën e menaxhimit të rrezikut nga ndryshimet klimatike për periudhën 2023 - 2025. Në këtë kontekst, parashihet miratimi i Politikës për qëndrueshmëri të punës së Bankës Popullore, si kontribut në ndërtimin e një shoqërie të qëndrueshme. Gjithashtu, do të punohet në mënyre aktive në procesin e testimit të stresit për të vlerësuar rezistencën e sistemit bankar ndaj ndikimit të rreziqeve që lidhen me ndryshimet klimatike, si dhe përfshirjen graduale aktive të rreziqeve klimatike në vlerësimin e profilit të rrezikut të bankave.

Me aktivitetet programore në fushën e pestë strategjike, përfshihen aspektet e përmirësimit të proceseve të brendshme dhe rezistencës ndaj sfidave dhe kërcënimeve globale, si dhe menaxhimi i duhur i rreziqeve financiare dhe jofinanciare, në kohë sfidash të rëndësishme globale dhe ndryshimit të mjedisit. Forcimi i sigurisë së sistemit të informacionit, rezistenca ndaj kërcënimeve kibernetike dhe sigurimi i vazhdimësisë së biznesit në mjedisin në ndryshim do të jenë fushat të cilave do t'i kushtohet vëmendje e veçantë gjatë vitit 2025. Në këto korniza, krahas pjesës tjetër, është planifikuar të fillojë përgatitja e Strategjisë për rezistencën kibernetike 2026 - 2028.

Të gjitha aktivitetet e planifikuara për vitin 2025 do të jenë bazë për realizimin e suksesshëm të vizionit të Bankës Popullore, që të njihet si institucion i pavarur, përgjegjës, profesional, inovativ dhe transparent, e cila me integritetin dhe besueshmërinë e saj nxit dhe ngrit besimin e publikut.