Скопје, 11 април 2020 година

„Финансиската поддршка од ММФ е од исклучително значење за нас, како за спроведување на фискалните мерки, така и за обезбедување натамошен раст на девизниот потенцијал на нашата економија, односно за зголемување на девизните резерви. На овој начин се создава поголем простор за спроведување олабавена монетарна политика и за обезбедување олеснети финансиски услови за кредитирање на погодените компании и граѓани.“ – истакна гувернерката на Народната банка, Анита Ангеловска-Бежоска, по повод позитивниот одговор на ММФ на барањето за одобрување финансиска поддршка за нашата земја преку Инструментот за брзо финансирање.

Овој инструмент, како што посочува гувернерката, е значајна алатка којашто овозможува и полесен пристап до други надворешни извори на финансирање, вклучително и до европските.

„Имено, одобрувањето на овој аранжман е и потврда на здравоста на политиките спроведувани од страна на централната банка, коишто придонесоа за ценовна и финансиска стабилност, што, пак, има важна сигнална улога за идна финансиска поддршка.“ – нагласи Ангеловска-Бежоска.

Според гувернерката, финансиските средства од ММФ ќе помогнат за ублажување на негативните ефекти за нашата економија, притоа давајќи ѝ дополнителна поддршка и на макроекономската стабилност.  

Видео-обраќањето е достапно тука.