Shkup, 10 qershor 2021  

Këtë vit kemi bërë disa ndryshime në qëllimet strategjike të Bankës Popullore, duke pasur parasysh që në periudhën e fundit po ndodhin ndryshime dinamike globale, të cilat kanë ndikim edhe tek ne si bankë qendrore. Proceset kryesore që përcaktojnë strategjinë tonë të re janë: globalizimi, përparimet teknologjike dhe inovacionet, industria fintech dhe goditjet e jashtme - të gjitha këto procese janë ngulitur në aspekte të veçanta të objektivave individualë në Planin Strategjik të Bankës Popullore.

Plani përmban nëntë qëllime strategjike - disa prej të cilave lidhen tradicionalisht me mandatin e bankës qendrore, gjegjësisht zbatimin e politikës monetare, stabilitetin e sistemit bankar, funksionimin e pandërprerë të sistemeve të pagesave dhe menaxhimin e rezervave të huaja, por duke vendosur theksin mbi sfidat dhe trendet e reja që do të jenë të pranishme në këto fusha në tre vitet e ardhshme.

Në Plan, kemi identifikuar edhe qëllime që janë një përgjigje e drejtpërdrejtë dhe vizionare ndaj ndryshimeve dinamike që po ndodhin dhe kërkojnë vëmendje të veçantë nga ne në tre vitet e ardhshme. Qëllime të tilla janë: transparenca dhe llogaridhënia e bankës qendrore, investimi në edukimin financiar dhe rritjen e ndërgjegjësimit për ndryshimet klimatike dhe kontributi për një ekonomi të qëndrueshme të gjelbër.

Kjo u theksua nga viceguvernatorja e Bankës Popullore, Ana Mitreska, në intervistën e mbrëmshme në emisionin “Magazina Ekonomike” në televizionin Alsat-M, kushtuar ndër të tjera edhe Planit të ri Strategjik të Bankës Popullore për periudhën e viteve 2022-2024.

Siç nënvizoi viceguvernatorja, Banka Popullore do të vazhdojë të jetë e përkushtuar në edukimin financiar dhe nxitjen e përfshirjes financiare, duke pasur parasysh rëndësinë e ndërgjegjësimit për rreziqet dhe kuptimin e përfitimeve nga përdorimi i shërbimeve të ndryshme financiare në kohën e inovacioneve teknologjike. Lidhur me transparencën dhe llogaridhënien, ajo vuri në dukje se arritja e këtij qëllimi do të sigurojë harmonizimin e mëtejshëm me standardet më të mira ndërkombëtare.

Mitreska theksoi se aktivitetet e bankave qendrore për të zbutur pasojat e pafavorshme ekonomike nga ndryshimet klimatike, përfshirë edhe efektet mbi sistemet financiare, po bëhen gjithnjë e më të rëndësishme në mbarë botën. Duke ndjekur këto trende, siç theksoi ajo, një qëllim i veçantë në lidhje me ndryshimet klimatike dhe nevojën për „financat e gjelbra“ është përfshirë në këtë plan strategjik.

Me këtë plan parashikohet nxitje dhe zhvillim i aktiviteteve kërkimore në fushën e „financave të gjelbra“, si fushë e cila duhet të inkorporohet në prioritetet e secilit institucione me përgjegjësi shoqërore, në mënyrë që të kontribuojë për krijimin e një ekonomie „të gjelbër“ të qëndrueshme, e cila në fund të fundit do të siguronte një standard më të lartë të jetës dhe përmirësim të cilësisë së jetës për qytetarët e saj. Banka Popullore tashmë ka filluar me aktivitete operacionale për të mbështetur „financat e gjelbra“ në fushën e operacioneve të saj. - tha Mitreska.

Duke folur për Planin Strategjik të Bankës Popullore, viceguvernatorja vuri në dukje se ai mbështetet në misionin, vizionin dhe vlerat e punës së Bankës Popullore - cilësia, integriteti, besnikëria, transparenca, lidershipi, inovacioni, fleksibiliteti, profesionalizmi dhe shpirti i ekipit. 

Plani Strategjik i Bankës Popullore  

Intervistën mund ta gjeni në: https://youtu.be/an5eEiS8iM0