Скопје, 4 јуни 2025 

Гувернерот на Народната банка, Трајко Славески, денес ја имаше својата прва работна средба со министерката за финансии, Гордана Димитриеска-Кочоска, по неговото неодамнешно назначување на функцијата.

На средбата беше изразено заедничкото уверување дека сегашната макроекономска стабилност е приоритет и таа треба и понатаму да се одржува и да се унапредува преку добро усогласени и координирани политики. Беше истакната важноста на блиската соработка помеѓу фискалната и монетарната власт за обезбедување предвидлива економска средина, како основен предуслов за побрз економски раст.

На средбата се разменија мислења за сегашните економски предизвици и можностите за понатамошно зајакнување на координацијата меѓу институциите заради донесување политики што ќе бидат одржливи и во интерес на граѓаните и на стопанството.

Покрај ова, беше нагласено и значењето на координираниот пристап на сите финансиски регулатори во земјава, за да се овозможи понатамошно развивање стабилен, конкурентен и сеопфатен финансиски систем, којшто ќе биде отпорен на надворешните шокови и ќе обезбеди долгорочен економски напредок.

Гувернерот Славески и министерката Димитриеска-Кочоска изразија подготвеност за постојана институционална комуникација и соработка, заради ефикасно справување со сегашните и со идните економски предизвици.