Procesi i normalizimit të politikës monetare, i cili filloi në dhjetor të vitit 2016, vazhdoi edhe gjatë muajve janar dhe shkurt të vitit 2017, ku norma bazë e interesit u zvogëlua edhe më tej për gjithsej 0,50 pikë përqindjeje, përkatësisht u reduktua në 3,25%.
Këshilli i Bankës Popullore të Republikës së Maqedonisë sot e zhvilloi mbledhjen e tij, në të cilën u miratuan raporti tremujor dhe projeksionet makroekonomike deri në fund të vitit 2017, dhe u konstatua se realizimet në tremujorin e parë të vitit 2017 tregojnë një pasqyrë të ngjashme makroekonomike si në projeksionet paraprake të tetorit. Procesi i normalizimit të politikës monetare, i cili filloi në dhjetor të vitit 2016, vazhdoi edhe gjatë muajve janar dhe shkurt të vitit 2017, ku norma bazë e interesit u zvogëlua edhe më tej për gjithsej 0,50 pikë përqindjeje, përkatësisht u reduktua në 3,25%. Si rezultat i kësaj, norma bazë e interesit u reduktua në nivelin e para muajit maj të vitit 2016, kur u krye shtrëngim i politikës monetare, si reaksion ndaj shtypjeve të shkaktuara nga spekulimet.
Kërkesa e huaj efektive është rishikuar përpjetë për vitin 2017, përderisa për vitin 2018 është bërë një korrigjim i vogël teposhtë. Realizimet e deritanishme, si dhe rritja e pritur ekonomike dhe rritja e çmimeve globale të prodhimeve primare sollën deri në një korrigjim përpjetë në inflacionin e huaj efektiv në vitin 2017, derisa për vitin 2018 pritjet nuk kanë ndryshuar. Sa i përket lëvizjes së çmimeve të prodhimeve primare, për vitin 2017 pritet një rritje më e lartë e çmimeve të energjetikëve, prodhimeve ushqimore dhe shumicës së metaleve në krahasim me projeksione e tetorit, derisa në vitin 2018 pritet rritje e mëtejshme e çmimeve të prodhimeve ushqimore dhe stabilizim i çmimeve të më shumë prodhimeve tjera primare, për shkak se për shumicën e prodhimeve primare pritjet për vitin 2018 janë të ngjashme si në tetor. Vazhdimi i trendit të rritjes së ekonomisë së vendit edhe gjatë vitit 2017 dhe vitit 2018 në masë të madhe bazohet mbi këto pritje.
Rritja e PBB-së prej 2,4% në vitin 2016 ishte në pajtueshmëri me pritjet paraprake, derisa për vitin 2017 pritet rritje e tij prej 2,5% dhe 3,2% në vitin 2018. Në bazë përmbledhëse, edhe brenda këtij cikli të projeksioneve, në periudhën 2017-2018 eksporti mbetet faktor bartës i rritjes së ekonomisë, me kontribut i cili është më i theksuar në krahasim me pritjet paraprake. Nga ana tjetër, ndryshime janë bërë në strukturën e kërkesës së brendshme, para së gjithash për vitin 2017, ku pritet që konsumi personal të vazhdojë të stimulojë ekonominë, derisa aktiviteti investues do të vazhdojë me rënie të butë, në kundërshtim me pritjet paraprake. Megjithatë, në vitin 2018 pritet një rritje solide e investimeve. Pritet që kontributi i konsumit publik ndaj rritjes së ekonomisë në vitin 2017 dhe 2018 të jetë mesatarisht neutral.
Aktiviteti kreditues i sektorit bankar edhe gjatë vitit 2017 dhe 2018 pritet ta mbështesë rritjen ekonomike. Në vitin 2017 pritet që ai të jetë 5,6%, ndërsa në vitin 2018, 6,7%. Vlerësimet për shpejtim të rritjes kreditore në vitin 2018 bazohen mbi pritjet për një mjedis më stabil dhe rritje të bazës depozituese, që në kushte të pozitës së favorshme kapitale dhe të likuiditetit të bankave do të krijonte hapësirë për rritje të financimit kreditor.
Pas rënies së moderuar të çmimeve në tri vitet e kaluara, në vitin 2017 dhe 2018 pritet normalizim gradual i inflacionit në 1,3% dhe 2%, respektivisht, dhe së këndejmi nuk janë bërë ndryshime në krahasim me ciklin paraprak të projeksioneve. Vlerësimit për rritje të inflacionit i reflektojnë pritjet aktuale për rritje të çmimeve globale të ushqimit dhe energjisë dhe inflacion më të lartë efektiv të huaj. Edhe kërkesa e brendshme pritet të ketë efekt pozitiv mbi inflacionin, në kushte kur hendeku i prodhimit është i vlerësuar si i moderuar pozitiv gjatë tërë periudhës së projeksioneve.
Vlerësimet e fundit për bilancin e pagesave tregojnë deficit të llogarisë korrente për periudhën 2017-2018, i cili mesatarisht është pak më i moderuar në krahasim me pritjet brenda projeksioneve të tetorit dhe është 2,3% e PBB-së. Në pikëpamje të llogarisë financiare, pritet që financimi i llogarisë korrente në këtë periudhë dyvjeçare të sigurohet përmes të hyrave afatgjate financiare jo të borxhit dhe të borxhit, respektivisht investimeve të huaja direkte dhe huamarrjes nga jashtë. Në periudhën 2017-2018, pritet që deficiti në llogarinë korrente plotësisht të mbulohet nga rrjedhat financiare, të cilat do të mundësojnë rritje të mëtejme të rezervave valutore. Kështu që, në tërë periudhën e projeksioneve, treguesit për përshtatshmëri të rezervave valutore janë në zonë të sigurt.
Në tërësi, realizimet tregojnë se edhe përpos rreziqeve të rritura në këtë periudhë, të lidhura me faktorë të natyrës së brendshme dhe të jashtme, vlerësimet për stablitet të themeleve të ekonomisë së vendit vazhdojnë të jenë solide. Ekonomia vazhdon të rikuperohet, pa shtypje të çmimeve dhe në kushte të ruajtjes së mëtejshme të rezervave valutore në nivel të përshtatshëm. Disa nga rreziqet e pafavorshme vazhdojnë të jenë prezente. Banka Popullore, edhe në periudhën që vijon me kujdes do t'i përcjellë zhvillimet dhe në pajtim me autorizimet e saj është në gjendje ta përkrahë atë rikuperim.
Në mbledhjen e sotme, Këshilli e adoptoi Planin strategjik të Bankës Popullore të Republikës së Maqedonisë për periudhën 2018-2020. Plani strategjik për vitet 2018-2020 përmban dhjetë qëllime strategjike të cilat, si vitin e kaluar, qartë e shprehin përcaktimin e Bankës Popullore për ruajtje të inflacionit të ulët dhe stabil përmes strategjisë për ruajtje të kursit stabil të denarit në raport me euron, ruajtje të stabilitetit financiar si element përbërës të stabilitetit makroekonomik dhe parakusht për realizimin e prosperitetit dhe rritjes ekonomike. Më tej, duke e pasur parasysh mjedisin dinamik dhe ndryshues, brenda Planit strategjik janë përpunuar sfidat themelore në punë, si dhe pikat më të rëndësishme, kritike të veprimtarisë në periudhën e ardhshme trevjeçare. Qëllimet e përcaktuara strategjike janë bazë për përpunimin e planeve të njësive organizative dhe Programit të punës së Bankës Popullore për vitin e ardhshëm.
Këshilli shqyrtoi edhe çështje tjera brenda juridiksionit të tij.