Shkup, 19 qershor 2026

Në Bankën Popullore u mbajt sesioni i 58-të i Klubit të hulumtuesve, platformë për prezantimin dhe shqyrtimin e punimeve shkencore hulumtuese të Bankës Popullore, e cila tashmë 13 vite mbështet veprimtarinë hulumtuese shkencore në vend.

Në këtë sesion u prezantua një punim shkencor në fazë përgatitore me temë „Një vështrim më i gjerë mbi stabilitetin e bankave: A janë kreditë jofunksionale të rëndësishme për vendet në zhvillim?“, nga autoret prof. dr. Besime Ziberi dhe dr. Artina Bexheti Baftijari.

Sesionin e hapi drejtoresha e Drejtorisë për Politikë Monetare dhe Hulumtim, Biljana Davidovska-Stojanova, e cila theksoi se kreditë jofunksionale paraqesin një nga sfidat më të mëdha për stabilitetin e sistemit financiar dhe për këtë arsye ato monitorohen dhe analizohen rregullisht.

„Niveli i lartë i kredive jofunksionale ndikon drejtpërdrejt në likuiditetin dhe solvencën e bankave, në profitabilitetin e tyre, si dhe mund të krijojë rreziqe sistemike që mund të çojnë në kriza bankare. Prandaj, përcaktimi i determinantëve të kredive jofunksionale ka rëndësi të veçantë për hartuesit e politikave dhe rregullatorët, me qëllim që dobësitë të identifikohen në kohë dhe të ruhet stabiliteti i përgjithshëm financiar në një ekonomi“, theksoi Davidovska-Stojanova.

Në emër të autoreve, gjetjet e hulumtimit i prezantoi Bexheti Baftijari, e cila theksoi se qëllimi kryesor i analizës është të ofrojë një vështrim më të gjerë mbi stabilitetin e bankave, përmes analizimit të determinantëve të kredive jofunksionale në ekonomitë e Ballkanit Perëndimor. Rezultatet e vlerësimeve panel për një periudhë 22-vjeçare tregojnë se faktorët makroekonomikë, si kursimet bruto të brendshme, punësimi dhe normat reale të interesit, kanë ndikimin më të madh në nivelin e tyre. Prandaj, përmirësimi i kushteve ekonomike mund të kontribuojë ndjeshëm në uljen e nivelit të kredive jofunksionale dhe në forcimin e stabilitetit financiar në rajon.

Sesionet e Klubit mbahen katër herë në vit. Banka Popullore publikon thirrje për hulumtuesit për prezantimin e punimeve, të cilat mund të jenë edhe në version pune. Punimet përgatiten në përputhje me trendet dhe standardet e hulumtimeve bashkëkohore, përkatësisht me analizë solide empirike dhe përfundime të sistematizuara. Në sesione marrin pjesë analistë dhe hulumtues nga institucione arsimore-shkencore dhe financiare, studentë dhe pjesëmarrës apo dëgjues të tjerë të interesuar.

Anëtarësimi është i hapur dhe më shumë informacione për Klubin mund të gjenden në këtë lidhje: https://www.nbrm.mk/klub_na_istrazhuvachi.nspx. 

Sesioni i radhës është planifikuar për muajin shtator të këtij viti.