Shkup, 24 mars 2021 

Blagoja Trajçeski dhe Mihail Atanasovski nga shkolla fillore „Sv. Kliment Ohridski“ nga Manastiri janë fituesit e garës nacionale dhe do të përfaqësojnë vendin tonë në finalen e Kuizit Evropian të Parasë, e cila virtualisht do të mbahet, më 20 prill të vitit 2021, në gjuhën angleze.

Sot, në garën e cila u mbajt në kuadër të Kuizit Evropian i Parasë, në një konkurrencë me bashkëmoshatarët e tyre nga i tërë vendi, ata arritën rezultatet më të mira, nën mentorimin e Bojana Dimovska Gonovska.

Vendin e dytë e fituan Bojana Angeleska dhe Zvezdana Duckinoviq nga SHFK „Hristo Uzunov“ nga Ohri, nën mentorimin e Gorica Duckinoviq, ndërsa vendin e tretë e fituan Filip Krsteski dhe Damjan Kocarevski nga SHFK „Hristo Uzunov“ nga Ohri, nën mentorimin e Gorica Duckinoviq.

Në garën nacionale e cila u mbajt virtualisht, me mundësinë për ta ndjekur drejtpërdrejt në kanalin e Asociacionit Bankar Maqedonas në „Youtube“, morën pjesë 325 ekipe nga 174 klasa, përkatësisht klasa nga 72 shkolla fillore dhe të mesme nën mentorimin e 83 mësuesve dhe profesorëve.

Kuizi është projekt i Federatës Evropiane të Bankave dhe synon të inkurajojë shkollat dhe mësuesit në Evropë të investojnë edhe më shumë në edukimin financiar të nxënësve të moshës 13 deri 15 vjeç. Për herë të tretë, vendi ynë është pjesë e këtij projekti të iniciuar dhe organizuar nga Asociacioni Bankar Maqedonas, në bashkëpunim me Banka Popullore dhe Komisionin e Letrave me Vlerë dhe me mbështetjen e Ministrisë së Financave dhe Ministrisë së Arsimit dhe Shkencës.

Ekipi fitues i garës nacionale të Kuizit Evropian i Parasë, ekipet që fituan vendin e dytë dhe të tretë, si dhe mentorët e tyre do të shpërblehen me çmime të përshtatshme.

Urime për më të mirët, por edhe për të gjithë nxënësit, mentorët dhe shkollat që kanë treguar një vetëdije të lartë për rëndësinë e madhe të kulturës financiare.

Java Globale e Parasë këtë vit mbahet nën moton „Kujdesuni për veten, kujdesuni për paratë tuaja“.