Më 10 tetor 2017, u zhvillua mbledhja e rregullt e Komitetit për Politikë Operative Monetare të BPRM-së, në të cilën u shqyrtua gjendja ekonomike në vend, zhvillimet në tregjet financiare ndërkombëtare dhe të vendit si dhe treguesit për ekonominë e vendit

Më 10 tetor 2017, u zhvillua mbledhja e rregullt e Komitetit për Politikë Operative Monetare të BPRM-së, në të cilën u shqyrtua gjendja ekonomike në vend, zhvillimet në tregjet financiare ndërkombëtare dhe të vendit si dhe treguesit për ekonominë e vendit në kontekst të qëndrimit të politikës monetare.

Në mbledhjen e Komitetit, pozicionimi ekzistues monetar u vlerësua si adekuat për kushtet aktuale të ekonomisë. Komiteti vlerësoi se numri më i madh i treguesve të rëndësishëm për politikën monetare nuk devijojnë konsiderueshëm nga pritjet, por megjithatë ekzistojnë pika ku ka nevojë për kujdes të caktuar. Në këtë kuptim, në mbledhje u vendos që në ankandin e bonove të bankës qendrore që do të mbahet më 12 tetor, të ofrohen bono të bankës qendrore në shumë prej 25.000 milionë denarësh, në nivelin e maturimit të ankandit të muajit shtator, me normë të interesit prej 3,25%. 

Në lidhje me treguesit konkret ekonomik, pas rënies së aktivitetit ekonomik të PBB-së në tremujorin e dytë, treguesit me frekuencë të lartë për tremujorin e tretë japin sinjale të ndryshme. Zhvillime të favorshme regjistrohen edhe në sektorin e ndërtimtarisë dhe të tregtisë, dhe në të njëjtën kohë të favorshme janë edhe sinjalet që i japin sondazhet hulumtuese për besimin ekonomik. Në anën tjetër, zhvillimet në sektorin industrial janë më pak të favorshme në raport me tremujorin e dytë. Sidoqoftë, të dhënat e disponueshme me frekuencë të lartë për tremujorin e tretë janë të kufizuara, dhe si pasojë është vështirë të formohet një vlerësim më preciz në aspektin e dinamikës së aktivitetit në këtë tremujor. Në lidhje me trajektoren e projektuar deri në fund të vitit, realizimet më të ulëta në gjysmën e parë të vitit krijojnë rreziqe teposhtë për projeksionin e PBB-së prej 2,5% për tërë vitin 2017. 

Të dhënat për inflacion për muajin shtator tregojnë ngadalësim të caktuar të normës vjetore të inflacionit në 1.7%, ku rritja mesatare vjetore e çmimeve në nëntë muajt e parë është 1.1%. Rritja mesatare e çmimeve në këtë periudhë fillimisht është reflektim i inflacionit bazë, dhe në masë më të ulët i çmimeve të energjisë. Çmimet e ushqimit vazhdojnë të kenë kontribut negativ në ndryshimin mesatar të çmimeve, që gradualisht zvogëlohet. Realizimet tek inflacioni, kryesisht janë në përputhje me projeksionin, ndërsa pritjet për supozimet hyrëse për çmimet e importit të prodhimeve primare janë kryesisht teposhtë, megjithatë shumë të ndryshueshme. Në rrethana të këtilla, rreziqet në lidhje me projeksionin e inflacionit mesatar për vitin 2017 (1,3%) vlerësohen si të balancuara.

Të dhënat fillestare monetare për muajin shtator të viti 2017 tregojnë zvogëlim të bazës depozituese të bankave në bazë mujore, i shkaktuar nga rënia e depozitave të korporatave, ndërsa kursimi i amvisërisë vazhdoi të rritet, me lëvizje dukshëm të favorshme në strukturën e tij valutore. Niveli i depozitave në total në fund të shtatorit është më i ulët në raport me projeksionet e muajit prill për tremujorin e tretë. Gjatë muajit shtator, në tregun e kredive, bankat vazhduan të sigurojnë mbështetje të kredisë të sektorit amvisëri, ndërsa kreditimi i sektorit të korporatave regjistroi rënie, kështu që kreditë në total në fund të shtatorit janë diçka më të ulëta nga pritjet brenda projeksioneve të muajit prill. 

Në periudhën ndërmjet dy mbledhjeve mujore të Komitetit, potenciali likuid i bankave u zvogëlua, kryesisht nën ndikimin e tërheqjes së mjete likuide për arsye të transaksioneve të shtetit që pjesërisht ishte e kompensuar me krijimin e likuiditetit në denarë nga intervenimet e Bankës Popullore për blerje të valutave të huaja në tregun valutor. Gjatë muajit, bankat vazhduan aktivisht të tregtojnë në tregjet e parasë, ndërsa mjetet e tepërta në llogaritë e tyre i drejtonin kah depozitat në dispozicion tek Bankën Popullore.

Për periudhën e muajit tetor në rezervën e detyruar, e cila fillon më 12 tetor, parashikohet rritje e likuiditetit nën ndikimin e lëvizjeve tek faktorët autonom, që do të mundësojë kompensim dhe stabilizim i potencialit likuid të bankave.

Sa i prket sektorit të jatshtëm, të dhënat për rezervat valutore për muajin shtator tregojnë ulje në raport me fundin e muajit qershor, që kryesisht është si rezultat i shlyerjes së rregullt të detyrimeve të shtetit në bazë të borxhit të jashtëm. Megjithatë, të gjithë treguesit e përshtatshmërisë së rezervave valutore tregojnë se ato vazhdimisht lëvizin në zonë të sigurt.  

Sa u përket të dhënave të disponueshme për sektorin e jashtëm në tremujorin e tretë, numri i tyre është i vogël dhe tani për tani tregojnë zhvillime në përputhje me pritjet, dhe kjo kryesisht lidhet me të dhënat për deficit tregtar në periudhën korrik-gusht dhe të dhënat e fundit të disponueshme për tregun e këmbimit. Megjithatë, numri i kufizuar i të dhënave dhe dinamika e ndryshueshme sezonale janë faktor kufizues për sjelljen e konkludimeve më të sigurta në lidhje me pritjet për treguesit nga sektori i jashtëm për tërë tremujorin.

Zhvillimet në tregun valutor janë relativisht të favorshme, ku që nga muaji gusht e këndej, Banka Popullore intervenoi në tregun valutor me net blerje të valutave të huaja. Në shtator, në kushte të ofertës më të lartë të valutave të huaja në tregun valutor ndërbankar, Banka Popullore intervenoi me neto blerje në shumë prej 9.0 milionë eurosh nga bankat mbështetëse. Analizuar nga dinamika, në gjysmën e parë të muajit, në rrethana të ofertës më të lartë dhe kërkesë stabile të valutave të huaja, bankat realizuan neto blerje të valutave të huaja në transaksionet me klientët pasuar me rritje të moderuar të likuiditetit valutor.  Rrjedhimisht, në gjysmën e dytë të muajit bankat kishin hapësirë për kompensim të kërkesës së rritur të valutave të huaja nga sektori i korporatave lidhur kryesisht me pagesën e dividendëve për investitorët e huaj. Në të njëjtën kohë, neto oferta e rritur e valutave të huaja nga jo rezidentët kontribuoi për ofertë më të lartë edhe në tregun ndërbankar, pasuar nga zvogëlimi në kursin ndërbankar deri në nivelin e kursit ndërhyrës të Bankës Popullore për blerje të valutave të huaja. Zhvillimet e favorshme në tregun valutor në transaksionet me klientët vazhduan edhe gjatë fillimit të muajit tetor, që mundësoi blerje të mëtejshme të valutave të huaja na ana e Bankës Popullore, në shumë prej 13,5 milionë eurosh, deri më 9 tetor.

Në shtator, në korniza globale, në rrethana të pritjeve të forcuara të investitorëve për normalizim të sinkronizuar të politikës monetare të bankave qendrore me ndikim më të madh, në tregjet e kapitalit u regjistrua rritje e rendimenteve të instrumenteve me rendiment fiks.  Në tregun valutor u vërejt përforcim i vlerës së valutës amerikane, duke pritur edhe një rritje të normës së interesit nga ana e bankës qendrore deri në fund të vitit. Në Eurozonë, mbizotërojnë zhvillime pozitive makroekonomike, por edhe informacione të përforcuara për pasigurinë politike pas zgjedhjeve të mbajtura në Gjermani dhe ngjarjet e lidhura me Kataloninë kah fundi i muajit.

Si përfundim, në mbledhje u konkludua se kushtet ekzistuese ekonomike dhe financiare, si dhe rreziqet ekzistuese tregojnë se pozicionimi monetar ekzistues tani për tani është adekuat. Pozita e jashtme shikuar përmes zhvillimeve tek llogaria rrjedhëse në bilancin e pagesave, në përgjithësi është brenda pritjeve dhe tregon ruajtjen e themeleve të shëndosha ekonomike. 

Banka Popullore edhe në periudhën e ardhshme me kujdes do ti përcjellë treguesit ekonomik, ku ndryshimet e ardhshme në politikën monetare në masë të madhe do të kushtëzohen nga zhvillimet në ekonominë e vendit dhe sektorin e jashtëm.