Shkup, 31 mars 2021  

Pagesat me karta pagese nga ana e qytetarëve në tregtinë e brendshme, në tremujorin e katërt të vitit 2020 shënuan një rritje të konsiderueshme në vlerën dhe numrin e transaksioneve të realizuara prej 34% dhe 29%, përkatësisht. Rritja e lartë vjetore e numrit të pagesave të qytetarëve në tregti është kryesisht për shkak të rritjes së numrit të pagesave me karta pagese në pikat e shitjes në internet, e cila në tremujorin e fundit të vitit 2020 ishte 153% dhe ishte dy herë më e lartë se rritja në tremujorin e njëjtë të vitit 2019 (71%). Lidhur me përdorimin e kartave të pagesave në pikat fizike të shitjes nga ana e qytetarëve, në tremujorin e fundit të vitit 2020 ka pasur një rritje prej 22%, që tregon një situatë të qëndrueshme dhe të pandryshuar në rritjen e pagesave me karta pagese në pikat fizike të shitjes, krahasuar me rritjen vjetore në tremujorin e vitit 2019.

Nga ana tjetër, ndikimi negativ i pandemisë është shprehur në pagesat e qytetarëve duke përdorur instrumentin e transferit të kredisë, i cili shënoi një rënie vjetore prej 3% në vlerën e transaksioneve, gjegjësisht rritje të moderuar vjetore prej 1,8% në numrin e transaksioneve.

Që nga fillimi i Kovid krizës këtej, në kushte të nevojës për mbrojtjen e shëndetit publik, izolimit dhe distancës sociale, qytetarët gjithnjë e më shumë përdorin përfitimet e bankingut elektronik. Numri i transfereve elektronike të kredisë të nisura nga ana e qytetarëve, në tremujorin e fundit të vitit 2020 është rritur me 39.5% në bazë vjetore, që është tre herë më shumë krahasuar me rritjen vjetore në tremujorin e njëjtë të vitit 2019 (11,8%). Për realizimin e pagesave, qytetarët në veçanti përdorin aplikacionet mobile, gjë që tregon një ndryshim të mëtejshëm të shprehive të pagesave përveç përdorimit të kanaleve dixhitale për pagesa. 

Ashtu si në periudhën e kaluar në kushte të pandemisë, vazhdon trendi i rritjes së numrit të pagesave të realizuara nga telefonat celularë, dhe në tremujorin e fundit të vitit 2020 kjo rritje arriti në 105%. Rritja në pagesat e realizuara në këtë mënyrë është gjithashtu shumë më e lartë nga rritja vjetore në tremujorin e katërt të vitit 2019, e cila ishte 42%. Për më tepër, në tremujorin e katërt të vitit 2020, edhe pse më e dobët për sa i përket përdorimit të aplikacioneve mobile, vazhdon rritja e përdorimit të kompjuterëve për realizimin e pagesave në vend nga ana e qytetarëve. Më konkretisht, në këto pagesa, në tremujorin e katërt të vitit 2020 kishte një rritje të lartë vjetore prej 18,3%, që është katër herë më e lartë nga rritja vjetore në tremujorin e katërt të vitit 2019 e cila ishte 4,7%. 

Nga ana tjetër, kushtet e imponuara nga pandemia e Kovid-19 kontribuuan në ndryshimin e shprehive të qytetarëve sa i përket nisjes së transfereve të kredisë në letër, me ç’rast numri i transfereve të kredive të nisura në këtë mënyrë shënoi rënie vjetore prej 14% në tremujorin e katërt të vitit 2020, përkundër rritjes vjetore prej 12,3% në tremujorin e njëjtë të vitit 2019.

Ndryshimi i shprehive të qytetarëve, në kushte të lëvizjes së kufizuar për shkak të pandemisë, kontribuoi për rritje të lartë vjetore të pagesave të tyre me karta pagesash përmes internetit në vend me 145%, si dhe transfereve të kredisë të nisura në mënyrë elektronike me 31%, gjatë gjithë vitit 2020.