Viceguvernatorja e Bankës Popullore, Ana Mitreska mori pjesë në Edicionin e 86-të të „East Jour Fixe“ - ngjarje e organizuar nga Banka Qendrore e Austrisë, e cila këtë vit, për shkak të rrethanave me pandeminë u mbajt në një format virtual. Në këtë ngjarje, fokusi është gjithmonë mbi temat dhe çështjet aktuale për komunitetin e bankingut qendror, ndërsa tema e edicionit të sivjetshëm ishte „Gjithçka për Kovid-19 - perspektivat gjeopolitike, ekonomike dhe makrofinanciare për vendet e Ballkanit Perëndimor“. 

Si folëse në sesionin e dytë në të cilin u diskutua për pasojat nga Kovid-19 mbi stabilitetin makrofinanciar, viceguvernatorja Mitreska dha një pasqyrë për rastin e ekonomisë maqedonase. Në kuadër të prezantimit të saj, ajo vuri në dukje bazat më të forta dhe dobësitë më të vogla me të cilat ekonomia maqedonase kapërcen Kovid krizën, krahasuar me periudhën e krizës financiare globale të vitit 2008. Sipas saj, kjo është e dukshme përmes më shumë segmenteve, përfshirë edhe përmes pozicionit më të fortë të jashtëm të ekonomisë, nivelit më të lartë të rezervave valutore, si dhe përmes qëndrueshmërisë së sistemit bankar.

Në fjalën e saj, viceguvernatorja theksoi edhe kanalet nëpërmjet të cilëve Kovid kriza transmetohet në ekonominë e vendit, duke theksuar kanalin e besimit dhe pritjeve si faktorë të rëndësishëm për zvogëlimin e konsumit dhe investimeve. Për më tepër, ajo iu referua edhe kanalit të lidhjeve tregtare dhe kërkesës së jashtme të zvogëluar, si faktorë që kanë një efekt të pafavorshëm mbi eksportin në kushte të përfshirjes së ekonomisë në zinxhirët global prodhues.

„Sidoqoftë, të dhënat tregojnë se këto efekte janë afatshkurtra dhe në kushte të hapjes së ekonomie ato gradualisht shterohen. Në fakt, struktura e ekonomisë dhe bazës së eksportit, të cilat dominohen nga mallrat, dhe jo shërbimet, janë një përparësi krahasuese për këtë periudhë, gjë që do të mundësojë rimëkëmbje më të shpejtë në afat të shkurtër krahasuar me disa ekonomi tjera.“ - theksoi Mitreska.

Theks të veçantë vendosi edhe mbi dërgesat, të cilat duke pasur parasysh specifikën e krizës shënojnë rënie.

Sa i përket politikës monetare dhe ndryshimeve rregullatore, viceguvernatorja theksoi se nga fillimi i Kovid krizës, Banka Popullore i relaksoi kushtet monetare. Ulja e normës bazë të interesit, sigurimi i likuiditetit shtesë, riaktivizimi i masës jokonvencionale për rezervë të detyruar, dhe sigurimi i fleksibilitetit rregullator me qëllim zvogëlimin e barrës financiare të kompanive dhe qytetarëve janë pjesë e masave të marra, të cilat Mitreska i përmendi gjatë diskutimit në këtë ngjarje.

„E gjithë kjo pako masash mundësoi relaksim të kushteve financiare dhe lehtësim të qasjes në financa, gjë që e lehtëson efektin e Kovid krizës mbi ekonominë e vendit.“ - theksoi viceguvernatorja.

Në fund të fjalës, ajo theksoi pasigurinë jashtëzakonisht të lartë të pranishme në ekonomi, duke pasur parasysh karakterin shëndetësor të krizës, si dhe nevojën për monitorim të kujdesshëm të të gjitha rrjedhave.

Viceguvernatorja e shfrytëzoi pjesëmarrjen në këtë ngjarje të rëndësishme ndërkombëtare për diskutime të veçanta me kolegët e saj nga rajoni dhe Evropa, të cilët në masë të madhe u përqendruan në këmbimin e përvojave të trajtimit të deritanishëm të Kovid krizës.