Shkup, 29 Tetor 2021
Kontributet e vazhdueshme në fushën e edukimit financiar dhe konfirmimi i rëndësisë së edukimit financiar po japin gjithnjë e më shumë rezultate, gjë që mund të shihet edhe përmes interesimit të popullatës së re. Këtë e vërtetojnë edhe rezultatet e konkursit të sivjetmë me rastin e Ditës Botërore të Kursimit, që tradicionalisht organizohet nga Banka Popullore dhe Ministria e Financave. Rezultatet e Konkursit tashmë janë publikuar në faqen e internetit të Bankës Popullore.
Ka pasur një interesim të madh te nxënësit e shkollave fillore. Në temën: „Kursimi – vendim i mençur për një të ardhme më të mirë“ mbërriti një numër më i madh i veprave letrare dhe artistike të nxënësve të shkollave fillore krahasuar me vitin e kaluar – 889 vepra në vitin 2021, krahasuar me 373 vepra në vitin 2020. Kanë mbërritur 181 vepra letrare - poezi, 180 vepra letrare - tregime dhe 528 vepra artistike - vizatime. Gjysma e numrit të përgjithshëm të punimeve janë dërguar në mënyrë elektronike.
Për konkursin e shpallur, pranuam 53 ese të shkruara nga nxënës të shkollave të mesme nga disa qytete të vendit. Tema e eseve ishte „Kursimi dhe menaxhimi i financave personale në epokën moderne digjitale”. Numri i punimeve është i përafërt me numrin e punimeve të dorëzuara një vit më parë. Në katër vitet e fundit të organizimit, ky konkurs është bë i njohur tek nxënësit e shkollave të mesme dhe tërheq vëmendjen e tyre.
Komisionet për vlerësimin e punimeve të pranuara shprehin kënaqësinë si për sasinë ashtu edhe për cilësinë e punimeve të paraqitura në Konkurs në vitin 2021, ku i referohen veçmas eseve të pranuara.
Shumica e eseve të marra karakterizohen nga cilësia solide sipas seriozitetit të pikëpamjeve të përcjella dhe stilit të të shprehurit, gjë që nxjerr në pah edhe niveli i dukshëm i edukimit financiar. Rrjedhimisht, eseja konsiderohet si opsion i përshtatshëm për nxënësit e shkollave të mesme si formë përmes së cilës ata mund të shprehin lirshëm pikëpamjet e tyre për kursimet dhe ta shqyrtojnë këtë temë nga këndvështrime të ndryshme. Sipas punimeve, tek disa të rinj ka zakone të zhvilluara të kursimit, por disa punime haptazi i referohen nevojës për më shumë informacion rreth kursimeve dhe institucioneve financiare, që është një konfirmim i drejtpërdrejtë i nevojës për aktivitete të mëtejshme në fushën e edukimit financiar të të rinjve. Për sa i përket temës, shumica e punimeve theksojnë ndërgjegjësimin për avantazhet dhe rreziqet e përdorimit të shërbimeve digjitale financiare, nevojën për edukim më të madh në këtë fushë, si dhe përfitimet e mundësive të edukimit financiar përmes përdorimit të kanaleve të edukimit digjital. Është kënaqësi e veçantë që në disa ese është theksuar se Konkursi inkurajoi nxënësit të lexojnë më shumë rreth edukimit financiar, duke arritur kështu qëllimin e tij.
Në përputhje me Strategjinë e parë kombëtare për edukim financiar dhe përfshirje financiare të miratuar, rregullatorët financiarë do të vazhdojnë me aktivitetet për edukimin financiar, si për të rinjtë ashtu edhe për të rriturit. Gjatë këtij muaji, për të rritur njohuritë e popullatës në fushën e kursimit, Banka Popullore publikoi një infografik për interes të thjeshtë dhe të përbërë, si një mjet i ri për edukimin financiar, i cili ofron një pamje piktoreske të temës, i dobishëm për të gjitha grupëmoshat.