Banka Popullore ndau Çmimin e Vitit për Hulumtuesit e Rinj për punimin më të mire në fushën e makroekonomisë dhe veprimtarisë bankare për vitin 2021. Fituesja e çmimit është Rehjan Sulejman, të cilës iu akordua çmimi i parë për punimin „Ndikimi i sipërmarrësisë mbi rritjen ekonomik në vendet në tranzicion dhe vendet nga rajoni MENA (Lindja e Mesme dhe Afrika Veriore): referuar Maqedonisë së Veriut“. 

Punimi i Sulejman u vlerësua me notën më të lartë mesatare, në pajtim me kriteret nga konkursi i publikuar. Bëhet fjalë për një punim që karakterizohet me konsistencë dhe hulumton një fushë relevante e cila ka të bëjë me zhvillimin ekonomik, me theks të veçantë në vendin tonë. Qëllimi i punimit është të shqyrtojë ndikimin e sipërmarrësisë mbi rritjen ekonomike. Në punim është dhënë një përmbledhje e sipërmarrësisë në vendin tonë, ndërsa analiza ekonomike është kryer me aplikimin e një metodologjie relevante (panel-vlerësim). Përfundimi kryesor i analizës është se aktiviteti i sipërmarrjeve është në fazë të hershme (TEA – total-early stage entrepreneurial activity) nuk ka ndikim me rëndësi statistikore mbi rritjen ekonomike, ndërsa bizneset e etabluara sipërmarrëse, ose të ashtuquajturat prona të biznesit (EBO – established business ownerships) kanë ndikim pozitiv mbi rritjen e PBB-së.

Punimi i Sulejman është publikuar në internet faqen e Bankës Popullore. 

Banka Popullore ndan Çmimin e Vitit për Hulumtues të Rinj, tashmë pesëmbëdhjetë vjet, për të stimuluar zhvillimin e mendimit shkencor në vend dhe afirmimin e kuadrove të reja profesionale. Konkursi për Çmimin e Vitit u shpall kah mesi i vitit të kaluar, ndërsa punimet dorëzoheshin deri më 1 shkurt të këtij viti. Në pajtim me rregullat standarde, të drejtë pjesëmarrjeje kanë autorët nga vendi deri në moshën tridhjetë e pesë vjeçare, me ç’rast çdo autor mund të konkurrojë vetëm me një punim, i cili duhet të përmbajë edhe pasqyrë për ekonominë maqedonase në lidhje me temën relevante. Në konkursin e sivjetshëm arritën dhe u shqyrtuan katër punime nga hulumtuesit e rinj.

Në pajtim me praktikën e deritanishme, punimi fitues „Ndikimi i sipërmarrësisë mbi rritjen ekonomik në vendet në tranzicion dhe vendet nga rajoni MENA (Lindja e Mesme dhe Afrika Veriore): referuar Maqedonisë së Veriut“ do të prezantohet në kuadër të aktiviteteve të Klubit të Hulumtuesve, në sesionin që do të mbahet në qershor.