Takim i drejtoreshës së FMN-së, Kristalina Georgieva dhe guvernatores së Bankës Popullore, Anita Angelovska-Bezhoska

Shkup, 26 mars 2021 

„Banka Popullore luan një rol jetësor në zbutjen e ndikimit të krizës dhe sigurimin e stabilitetit ekonomik dhe financiar. Profesionalizmi dhe pavarësia juaj janë thelbësore.“ - tha drejtoresha e FMN-së, Kristalina Georgieva në takim e djeshëm me guvernatoren e Bankës Popullore, Anita Angelovska-Bezhoska.

Takimi theksoi rëndësinë e institucioneve të forta dhe të besueshme, veçanërisht në kohë krize, kur duhet të bëjnë gjithçka për ruajtjen e besimit dhe mbështetjen e amvisërive dhe kompanive. Gjithashtu, u theksua se profesionalizmi dhe pavarësia e bankës qendrore janë parakushtet kryesore për përmbushjen e mandatit të saj, duke përfshirë edhe sigurimin e stabilitetit të përgjithshëm të sistemit financiar.

Guvernatorja Angelovska-Bezhoska nënvizoi mbështetjen dhe partneritetin e FMN-së ndër vite. „Për ne është me rëndësi të veçantë që kemi një partner ndërkombëtar me integritet, profesionalizëm dhe ekspertizë të fortë, i cili vazhdimisht investon në përmirësimin e kapaciteteve tona dhe na ndihmon në forcimin e rolit tonë në shoqëri.“ - tha guvernatoraj Angelovska-Bezhoska.

Lidhur me krizën shëndetësore aktuale, Georgieva dhe Angelovska-Bezhoska folën për pasigurinë dhe sfidat e politikëbërësve në periudhën që vjen. Në takim u theksua se vigjilenca dhe kujdesi global janë të nevojshme në këto rrethana për shkak të pasigurisë për kohëzgjatjen dhe pasojat e pandemisë. Kjo vlen edhe për politikat e sektorit financiar, të cilat duhet të përfshijnë masa për të forcuar qëndrueshmërinë e sistemit financiar. Në këtë kontekst, nevoja për kujdes në politikat e shpërndarjes së dividendit u theksua si një hap i rëndësishëm në ndërtimin e kapacitetit të sistemit, derisa të fillojë një proces i rimëkëmbjes së qëndrueshme.

Në fund të takimit u arrit në përfundimin se FMN-ja dhe Banka Popullore do të vazhdojnë bashkëpunimin intensiv, duke mbështetur përpjekjet për krijimin e përfitimeve për ekonominë dhe shoqërinë dhe mbrojtjen e interesit publik. Në këtë drejtim, pjesëmarrja vullnetare e Bankës Popullore në vlerësimin pilot të pajtueshmërisë me Kodin e Transparencës së Bankave Qendrore të FMN-së u vlerësua si një investim shtesë i rëndësishëm në forcimin e transparencës dhe integritetit të institucionit.