Shkup, 25 maj 2021
Viceguvernatorja e Bankës Popullore, Ana Mitreska, në takimin e rregullt të Bankës së Rregullimeve Ndërkombëtare (BIS), për politikën monetare në vendet e Evropës Qendrore dhe Juglindore
Inflacioni në ekonominë maqedonase, si dhe në shumicën e vendeve në rajon, do të nxitet nga ndryshimet në çmimet e importit. Sidoqoftë, këta janë faktorë globalë që vlerësohen si të përkohshëm dhe megjithëse janë të mundshme disa efekte të transferueshme, nuk priten presione më të mëdha të çmimeve. Prandaj, duke pasur parasysh vlerësimet për mungesën e presioneve të kërkesës, nuk ka nevojë për ndryshime në pozicionimin e lehtësuar të politikës monetare.
Kjo u deklarua nga viceguvernatorja Ana Mitreska në takimin e rregullt vjetor të Bankës së Rregullimeve Ndërkombëtare (BIS), në të cilin u bisedua për politikën monetare në vendet e Evropës Qendrore dhe Juglindore. Në takim, u diskutuan disa tema - efektet nga pandemia mbi rritjen ekonomike dhe mbi potencialin afatgjatë të ekonomive, rezistenca e sektorit financiar në rajon, reagimi fiskal dhe koordinimi me politikën monetare, si dhe dinamika e inflacionit dhe pozicionimi monetar.
Viceguvernatorja në veçanti iu referua lëvizjes së inflacionit në rajon, duke theksuar se në vitin pandemik 2020, ajo u ngadalësua mesatarisht dhe u mbajt në zonën e ndryshimeve të moderuara pozitive. Në këtë pasqyrë futet edhe ekonomia maqedonase, duke pasur parasysh faktin se inflacioni nuk ka pasur ndryshime më të mëdha dhe është ruajtur brenda një kornize të kontrolluar.
Pritjet e inflacionit për periudhën e ardhshme për të gjithë rajonin ndikohen nga ndryshimet e fundit në rritje të çmimeve të produkteve parësore në tregjet botërore, gjë që pritet duke pasur parasysh rezistencën e madhe tregtare të këtyre ekonomive dhe varësia e tyre importuese. Sidoqoftë, parashikimet për inflacionin në rajon për vitet e ardhshme nuk kanë ndryshuar ndjeshëm krahasuar me parashikimet para pandemisë, duke treguar se rritja e çmimeve të importit, në kushte të rimëkëmbjes graduale të ekonomive, nuk do të shkaktonte presione të vazhdueshme mbi nivelin e çmimeve. Ekzistojnë disa rreziqe, duke pasur parasysh mjedisin e pasigurt, por ato monitorohen me kujdes nga ana e të gjithë bankave qendrore në rajon.