Shkup, 24 qershor 2021  

Efektet e politikës monetare stimuluese janë të dukshme në tregun e kredisë: Nuk pati asnjë ndalesë të flukseve të kredisë gjatë vitit të kaluar dhe këtij viti - aktiviteti i huadhënies po rritet me një ritëm të ngjashëm me atë para krizës. Kreditë u rritën me një normë prej rreth 6% gjatë vitit të kaluar dhe në muajt e parë të këtij viti. Në fakt, gjatë vitit të kaluar, rritja e mbështetjes kreditore për ekonominë i tejkaloi pritjet e bankës qendrore. Vërehet një orientim më i madh për kreditimin e familjeve, por flukset e kredive për sektorin e korporatave janë gjithashtu pozitive.

Kjo, ndër të tjera, u theksua nga guvernatorja e Bankës Popullore, Anita Angelovska-Bezhoska, në forumin e Parë Ekonomik në Shkup, të organizuar nga Forumi Ekonomik nga Delfi, Greqi dhe Asociacioni Grek i Biznesit në Maqedoninë e Veriut, në partneritet dhe bashkëpunim me kompanitë vendase. Ajo mori pjesë edhe në panel diskutimin për rimëkëmbjen pas-pandemike të ekonomisë tonë.

Guvernatorja theksoi se kjo është kriza e parë, në të cilën, Banka Popullore që nga fillimi ka zbatuar një politikë të lehtësuar monetare me qëllim ruajtjen e kushteve të favorshme financiare, për dallim nga episodet e krizave të kaluara kur norma bazë e interesit rritej, gjë që çoi në shtrëngimin e kushteve të kredisë. Që nga fillimi i pandemisë, Banka Popullore reduktonte normën e interesit në disa raste dhe ndërmori edhe masa tjera monetare të cilat çuan në uljen e normave të interesit të kredive dhe rritje të qëndrueshme të mbështetjes kreditore për qytetarët dhe kompanitë.

Në panel diskutim, guvernatorja iu referua edhe pritjeve për rritje ekonomike për këtë vit dhe në plan afatmesëm, me ç’rast vuri në dukje rëndësinë e ngjarjeve në ekonominë globale dhe veçanërisht atë evropiane. Në të njëjtën kohë, ajo vuri në dukje se, në parashikimet dhe vlerësimet e deritanishme të Bankës Popullore, përfshirë edhe sa i përket vlerësimit të potencialit për rritje ekonomike, nuk janë marrë parasysh supozimet për zbatim më intensiv të reformave strukturore që janë thelbësore për potencialin e ekonomisë për zbatimin e mëtejshëm të të cilit kërkohet angazhim.