Uashingon, 23 prill 2022

Nuk duhet të ketë shqetësime për stabilitetin e kursit të këmbimit të denarit. Për më shumë se dy dekada, banka qendrore ka ruajtur me sukses stabilitetin e valutës vendase kundrejt euros, përfshirë edhe shumë episode krizash në të cilat ka kaluar vendi dhe ekonomia. Ky është konfirmim i qartë i kapacitetit dhe instrumenteve adekuate që ka banka jonë qendrore, theksoi në intervistë për Zërin e Amerikës, guvernatorja e Bankës Popullore, Anita Angellovska-Bezhoska, e cila është pjesëmarrëse në Takimet Pranverore të Fondit Monetar Ndërkombëtar (FMN) dhe Bankës Botërore në Uashington.

Gjatë Takimeve Pranverore, FMN-ja publikoi parashikimet më të reja, në të cilat merren parasysh efektet e luftës së Ukrainës në ekonominë globale. Në këtë kontekst, FMN-ja bëri korrigjim në rënie të pritshmërive për rezultatin ekonomik të këtij viti në të gjitha vendet, përfshirë edhe ekonominë tonë.

Rritja ekonomike globale pas një rritjeje solide prej 6,1 përqind vitin e kaluar, këtë vit dhe vitin tjetër parashikohet në 3,6 përqind, që është ngadalësim i dukshëm. Në lidhje me shifrat për ekonominë tonë, është bërë rishikim në rënie nga 4,2 përqind në 3,2 përqind për këtë vit dhe për vitin e ardhshëm 2,7 përqind. Këto shifra janë të ngjashme me rajonin e Ballkanit Perëndimor.

Banka qendrore është duke përgatitur projeksione makroekonomike. Ne, me grupin e fundit të projeksioneve makroekonomike, të cilat datojnë nga tetori i vitit të kaluar, prisnim rritje prej 3,9 përqind për këtë vit, por duke pasur parasysh goditjen e re dhe rreziqet të cilat lidhen me të, aktualisht jemi duke punuar në projeksione të reja, dhe ka shumë gjasa që të ketë një rishikim në rënie”, thekson guvernatorja Angellovska-Bezhoska.

Guvernatorja theksoi se është me rëndësi të madhe në këtë kontekst, që sektori bankar ka kapacitet dhe stabilitet për të mbështetur sektorin ekonomik.

“Sektori bankar ka kapacitet të mjaftueshëm për të ruajtur stabilitetin e tij dhe për të ndihmuar sektorin ekonomik të përballet më lehtë me pasojat e kësaj goditjeje. Rritja e kredive është 9 përqind, ku mbështetja kreditore e sektorit të korporatave është 10 përqind dhe e popullsisë rreth 8 përqind. Është e rëndësishme në situata të tilla kur ekonomia globale dhe ajo vendase përballen me një tronditje të tillë, sektori bankar të mbetet i shëndoshë në ekonomi”, tha Angellovska-Bezhoska.

Delegacioni, nën udhëheqjen e guvernatores së Bankës Popullore dhe ministrit të Financave Fatmir Besimi, morën pjesë në Takimet Pranverore të FMN-së dhe Bankës Botërore në Uashington, gjatë të cilave delegacioni ka pasur takime me përfaqësues të lartë të FMN-së dhe Grupit të Bankës Botërore.