Shkup, 21 qershor 2021  

Përfshirja më e madhe financiare në përgjithësi, veçanërisht përfshirja më e madhe financiare e grave, padyshim mund të sjellë një numër përfitimesh ekonomike për shoqërinë në tërësi. Por, për fat të keq, studimet dhe të dhënat në nivel global, siç është Anketa e FMN-së mbi qasjen financiare, tregojnë një hendek relativisht të gjerë në qasjen në financa. Ky është një fenomen kompleks që duhet të zgjidhet në mënyrë holistike, me politika që janë jashtë punës së bankave qendrore, por mendoj se edhe ne, si bankierë qendrorë, mund dhe duhet të ndërmarrim disa hapa në atë drejtim.

Ky është një nga mesazhet që i dërgoi guvernatorja e Bankës Popullore, Anita Angelovska-Bezhoska në video bisedën për “Euromoney#, me të cilën filluan aktivitetet e programit të Forumit Global të Huamarrësve dhe Investitorëve të Obligacioneve. Biseda me „Euromoney“ iu kushtua çështjeve për përfshirjen e grave në rrjedhat ekonomike, veçanërisht në kontekst të sfidave nga kriza aktuale e koronës.

„Sa i përket qasjes në kredi, gratë përbëjnë 45% nga numri total i huamarrësve, krahasuar me 55% meshkuj, dhe sa i përket vëllimit të kredive, edhe më pak, gjegjësisht vetëm 38% nga numri total i huave të miratuara u përkasin grave. Sa i përket dinamikës, ka një përmirësim për 3 pikë përqindjeje në 10 vitet e fundit, gjegjësisht pjesëmarrja e grave në totalin e kredive është rritur nga 35% në 38%. Megjithatë, të dhënat tregojnë se meshkujt kanë qasje më të lehtë në financa.“ - theksoi guvernatorja.

Guvernatorja përmendi edhe dy aspekte në të cilat bankat qendrore duhet të fokusohen gjatë trajtimit të hendekut të përfshirjes financiare të meshkujve dhe grave.

„Fillimisht, ne mund të krijojmë një mjedis rregullator që do të çonte në konkurrencë më të madhe dhe produkte të reja, më të lira dhe më të mira në pajtim me nevojat e klientëve - për shembull produktet fintech. Ata mund të sigurojnë qasje më të lehtë në financa për gratë edhe për grupet tjera të cilat tradicionalisht janë më pak të përfshira në sistemin financiar formal. Në këtë kontekst, ne si bankë qendrore jemi në fazën përfundimtare të përfundimit të Ligjit të ri për Shërbimet e Pagesave dhe Sistemet e Pagesave, i cili promovon konkurrencë, transparencës, si dhe mbrojtje më të madhe të konsumatorëve, për të cilin konsiderojmë se do ta zvogëlojë hendekun e qasjes në financa. Një nga përparësitë kryesore të kësaj kornize ligjore do të jetë prezantimi i llogarisë për pagesa me funksione bazë, që do të jetë falas për kategoritë e rrezikuara.“ - theksoi guvernatorja gjatë bisedës.

Aspekti tjetër të cilin e përmendi është investimi në edukim financiar. Niveli më i lartë i kulturës financiare do ta lehtësojë edhe qasjen e qytetarëve në financa. Anketa e OECD-së qartë tregon se nevojiten përpjekje shtesë për rritjen e mëtejshme të nivelit të kulturës financiare në rajonin e EJL-së përfshirë edhe vendin tonë.

Gjatë bisedës, ajo iu referua edhe çështjeve të barazisë gjinore në bankat qendrore dhe sfidave në këtë segment, të cilat i solli pandemia e Kovid-19.

Forumi Global i Huamarrësve dhe Investitorëve të Obligacioneve është një nga ngjarjet më të rëndësishme ndërkombëtare të organizuar nga „Euromoney“.