Shkup, 21 maj 2021  

Fondi Evropian për Evropën Juglindore (EFSE) do të vazhdojë të mbështesë Bankën Popullore në aktivitetin e saj në sferën e edukimit financiar dhe përfshirjes financiare, të cilat ofrojnë përfitime të konsiderueshme për popullatën në një periudhë afatgjate. Prandaj, EFSE është e kënaqur të fillojë përfshirjen e Bankës Popullore edhe në ciklin e planifikimit strategjik të Fondit, në mënyrë që të sigurojë mbështetjen e duhur për gamën e gjerë të iniciativave që ka Banka Popullore.

Kjo u deklarua nga kryetari i Bordit të Drejtorëve të EFSE-së, Klaus Miler, në takimin e punës me guvernatoren e Bankës Popullore, Anita Angelovska-Bezhoska.

Guvernatorja Angelovska-Bezhoska theksoi se është jashtëzakonisht e rëndësishme që në periudhën e deritanishme EFSE po mbështet me sukses aktivitete e Bankës Popullore në dy fusha të rëndësishme që plotësojnë njëra-tjetrën. Gjegjësisht, shumica e projekteve të mbështetura nga EFSE janë në fushën e edukimit financiar. Ndër të tjera, ato përfshijnë përgatitjen e materialeve edukative, përfshirë botime dhe video materiale për edukimin financiar të të gjithë strukturave të grupmoshave të popullsisë. Me mbështetjen e EFSE-së, u krye edhe matja e nivelit të kulturës financiare të popullsisë së rritur në vendin tonë, e cila ofroi udhëzime për hartimin e duhur të aktiviteteve të mëtejshme, përfshirë edhe përgatitjen e Strategjisë së parë Kombëtare për Edukim financiar dhe Përfshirje Financiare.

Siç u theksua në takim, me projektet e mbështetura nga EFSE, Banka Popullore krijon kushte për rritjen e  njohurive dhe të kuptuarit të produkteve financiare nga ana e popullatës, e cila është një parakusht i rëndësishëm për përfshirje më të madhe financiare, si dhe përdorim më të mirë të përfitimeve që i ofron industria fintech. Si rezultat i mbështetjes në sferën e fintech, kohëve të fundit është kryer një analizë/anketë për industrinë fintech.

EFSE është formuar nga Banka Gjermane për Zhvillim (KfW), me mbështetje financiare nga Ministria Federale për Bashkëpunim dhe Zhvillim Ekonomik të Gjermanisë (BMZ) dhe Komisionit Evropian. Struktura e saj është një partneritet publik privat, prandaj shquhet si një model me rol ndërkombëtare dhe politikë inovative të zhvillimit. Ky model organizativ mundëson që EFSE të mobilizojë fonde nga investitorë privatë institucionalë dhe të shërbejë si platformë për koordinim të aktiviteteve të donatorëve në rajon dhe Evropën Juglindore. EFSE promovon zhvillim të përgjegjshëm të sektorit financiar në vendet e synuara të EFSE-së.