Shkup, 20 tetor 2021

Në Raportin e Komisionit Evropian (KE), në të cilin çdo vit vlerësohen në detaje politikat dhe përparimi i reformave në secilin vend kandidat ose kandidat potencial për anëtarësim në Bashkimin Evropian, janë dhënë vlerësime pozitive për politikën monetare dhe Bankën Popullore të Republikës së Maqedonisë së Veriut. KE vlerëson se nga aspekti i politikës monetare, harmonizimi me legjislacionin evropian është në fazë të avancuar, dhe theksohet se gjatë krizës së koronës, banka qendrore arriti të ruajë stabilitetin financiar, si dhe të sigurojë hapësirë ​​për mbështetje të konsiderueshme kreditore për qytetarët dhe kompanitë. Raporti thekson gjithashtu edhe rëndësinë e jashtëzakonshme të pavarësisë së bankës qendrore.

"Institucion plotësisht i pavarur, pa ndërhyrje të autoriteteve të tjera, është jetik për realizimin e rolit të bankës qendrore si garantues i stabilitetit monetar dhe financiar," thuhet në raport.

KE vlerëson se gjatë krizës së shkaktuar nga Kovid-19, banka qendrore arriti të ruajë stabilitetin financiar dhe të sigurojë mbështetje të konsiderueshme kreditore për qytetarët dhe kompanitë. Banka Popullore uli normën bazë të interesit në nivel historikisht më të ulët prej 1.25%, me çka liroi likuiditetin e nevojshëm në ekonomi për të stimuluar aktivitetin ekonomik. KE thekson gjithashtu se politika monetare është e përshtatshme për kushtet makroekonomike dhe gjithashtu thekson edhe trendin në rritje të mbështetjes kreditore.

Në Raport thuhet se përveç mbështetjes së rimëkëmbjes aktuale ekonomike, politika monetare po monitoron nga afër presionet inflacioniste në rritje.

Në kapitullin e statistikave, vlerësim i veçantë jepet për statistikat të cilat janë në kompetencë të bankës qendrore. Komisioni Evropian thekson se Banka Popullore është plotësisht e angazhuar në zbatimin e Kodit të Standardeve Statistikore dhe se po përmirëson kapacitetin për zbatim të vazhdueshëm në operacionet e saj. Si arritje e veçantë përmendet fakti se në fushën e statistikave të llogarive financiare, Banka Popullore për herë të parë publikoi të dhëna vjetore për llogaritë financiare dhe rregullisht dërgon të dhëna në Eurostat, me metodologji të përmirësuar dhe përfshirrje për instrumente të caktuar financiarë. Lidhur me statistikat mbi bilancin e pagesave dhe investimet e huaja direkte (IHD), KE thekson se Banka Popullore e përgatit atë sipas standardeve më të fundit.

Raporti vëren gjithashtu se Ligji për Shërbimet e Pagesave dhe Sistemet e Pagesave, i cili synon të harmonizojë legjislacionin vendas me atë Evropian, ka hyrë në procedurën qeveritare dhe se Banka Popullore është në fazë të avancuar të përgatitjes së akteve nënligjore. Gjithashtu u vu re se Banka Popullore ka bërë përparim në kryerjen e analizave teknike dhe zbulimin e parave të falsifikuara, përmes mjeteve të reja metodologjike, si dhe shkëmbim në kohë të të dhënave me institucionet kombëtare dhe ndërkombëtare.

Për më tepër, Raportin e KE mund ta gjeni në linkun në vazhdim:
https://ec.europa.eu/neighbourhood-enlargement/north-macedonia-report-2021_en