Lehtësohet investimi në letra me vlerë jashtë vendit

Shkup, 20 prill 2021 

Këshilli i Bankës Popullore mbajti mbledhjen e rregullt në të cilën u miratua Vendimi për ndryshim të Vendimin për mënyrën dhe kushtet nën të cilat rezidentët që nuk janë banka të autorizuara, mund të hapin dhe të posedojnë llogari jashtë vendit. Ndryshimet e miratuara zgjerojnë mundësitë për hapjen dhe posedimin e një llogarie nga rezidentët jashtë vendit për nevoja të transaksioneve me letra me vlerë jashtë vendit. Më konkretisht, me ndryshimet e propozuara, përveç në një bankë të huaj, rezidenti mund të ketë llogari edhe:

• Tek një pjesëmarrës i autorizuar në një bursë të huaj ose në një treg të organizuar të letrave me vlerë;
• Tek institucionet e pagesave ose institucionet për para elektronike jashtë vendit për qëllime komerciale, por edhe për tregtim me letra me vlerë nëse njëkohësisht janë edhe pjesëmarrës të autorizuar në një bursë të huaj ose në një treg të organizuar të letrave me vlerë. 

Këshilli i Bankës Popullore miratoi ndryshimin e Vendimit për dorëzim dhe publikim të të dhënave për aktivitetet e kryera në qarkullimin pagesor. Gjegjësisht, me këtë vendim, Banka Popullore zgjeron tërësinë e të dhënave nga fusha e statistikës së pagesave që janë mbledhur deri më tani dhe të cilat harmonizohen ndjeshëm me standardet dhe kërkesat e statistikave të pagesave të Bankës Qendrore Evropiane dhe Bankës për Rregullime Ndërkombëtare.

Në mënyrë që të sigurojë të dhëna më të hollësishme për dixhitalizimin e sektorit bankar në vend, Banka Popullore do të fillojë me mbledhjen e të dhënave vjetore lidhur me transformimin dixhital të shërbimeve të pagesave dhe përfshirjen financiare të popullatës në përdorimin e kanaleve dixhitale për realizimin e pagesave. Mbledhja e të dhënave në këtë fushë do të forcojë bazën e informacionit për formulimin e politikave për zhvillim të shërbimeve të pagesave dhe sistemeve të pagesave brenda Bankës Popullore, për përcaktimin e drejtimeve strategjike për zhvillim të planit nacional të pagesave brenda kompetencave të Këshillit Nacional për Sisteme të Pagesave, si dhe më gjerë, për të gjithë palët e interesit në sistemin e përgjithshëm financiar në vend duke rritur nivelin e transparencës me publikimin e këtyre të dhënave.

Shumica e të dhënave do të publikohen në bazë vjetore në faqen e internetit të Bankës Popullore, gjë që do të kontribuojë për rritjen e transparencës në lidhje me nivelin e dixhitalizimit në sferën e pagesave në vendin tonë.