Shkup, 18 maj 2021

Muzeu i Bankës Popullore, me një sërë aktivitetesh që do të zgjasin gjatë gjithë javës, do të shënojë Ditën Ndërkombëtare të Muzeve - 18 maj.

Në bashkëpunim me shkollat fillore të komunës Qendër, Muzeu i Bankës Popullore do të organizojë prezantime elektronike për nxënësit nga klasa e 3-të deri në klasën e 9-të, të cilat filluan dje, dhe do të zgjasin gjatë gjithë javës së punës.

Gjatë prezantimeve interaktive të kuratorëve dhe konservatorëve të Muzeut të Bankës, nxënësit do të kenë mundësinë të fitojnë njohuri të reja për rrugën e gjatë historike-evolucionare të parave si një nga zbulimet më të rëndësishme teknologjike të njeriut dhe veçanërisht për tiparet e tyre të qenësishme për territorin maqedonas. Në të njëjtën kohë, shëtitja virtuale do t’u zbulojë atyre një pjesë të thesarit numizmatik të ekspozuar në ekspozitën e përhershme muzeore, por gjithashtu do t’u mundësojë atyre të mësojnë rreth mënyrave në të cilat laboratori i specializuar i konservimit kujdeset për mbrojtjen dhe ruajtjen fiziko-kimike.

Për më tepër, në këto vite sfidash për kulturën dhe veprimin njerëzor në fushën e ruajtjes dhe promovimit të trashëgimisë kulturore, Muzeu i BP-së, në kuadër të shënimit të Ditës së Muzeve, përgatiti gjashtë video edukative për emetimet më ekskluzive dhe më të rëndësishme të parave që janë prodhuar në territori e shtetit modern maqedonas, duke filluar nga shekulli i 6-të p.e.s., deri në periudhën osmane dhe janë pjesë e Koleksionit Numizmatik të Bankës Popullore.

Çdo video-shënim i kushtohet një aktiviteti të veçantë të prerjes së monedhave në një periudhë të veçantë historike, duke paraqitur një seri unike narrative që flet për prodhimin e monedhave të fiseve të paionëve, mbretërve të Paionisë, qytetit maqedonas Lihnid, qytetit romak Stobi, mbretit mesjetar Vulkashin dhe mbretit Marko dhe farkëtarive otomane në Shkup, Kratovë dhe Ohër.

Video-shënimet mund t’i gjeni në internet faqen e Bankës Popullore, dhe gjatë kësaj jave do të publikohen edhe në faqet zyrtare në rrjetet shoqërore.

Përmes formave të tilla të edukimit muzeor, Banka Popullore vazhdon të promovojë përpjekjet e saj për ruajtjen e trashëgimisë kulturore, por edhe për ruajtjen e kujtesës publike për vlerën universale të arritjeve të civilizimit në të kaluarën si një parim themelor njerëzor për arritjen e stabilitetit të tanishëm shoqëror dhe progresin e ardhshëm teknologjik.