Edhe në kushtet e imponuara nga pandemia, interesi për veprimtarinë hulumtuese nuk zbutet dhe interesi për prezantimin e punimeve në seancat e Klubit është konstant.

Shkup, 17 shtator 2021

Dje u mbajt sesioni i 40-të i Klubit të Hulumtuesve i formuar nga Banka Popullore, i cili edhe në kushtet e imponuara nga pandemia, në format virtual, vazhdimisht arrin qëllimin si platformë për prezantim dhe diskutim të punimeve hulumtuese shkencore, veçanërisht në fushën e politikës monetare dhe makroekonomisë.

"Ky është një jubile i vogël, në të cilin për fat të keq, për shkak të rrethanave me pandeminë, përsëri takohemi virtualisht. Por ajo që na bën të lumtur si bankë qendrore është se edhe në këtë model të ri jetese dhe pune të imponuar nga pandemia, interesi për punën hulumtuese nuk zbutet, gjithashtu nuk është më e vogël as edhe dëshira për rishikim të gjetjeve dhe konkluzioneve të fundit dhe për diskutim të përbashkët proaktiv, përmes Klubit si formë prezantimi dhe diskutimi që lidh komunitetin tonë hulumtues. Përkatësisht, fakti që në rrethana të tilla të pazakonta për bartësit e politikave është e rëndësishme që të "ushqehemi" vazhdimisht me konkluzione të argumentuara, analitike dhe hulumtuese, në mënyrë që të marrim masa në kohë dhe të dizajnuara në mënyrë të përshtatshme"- tha viceguvernatorja e Bankës Popullore, Ana Mitreska, në prezantimin e saj me të cilën hapi eventin virtual.

Dy punime hulumtuese u prezantuan në sesion të cilat janë jashtëzakonisht të rëndësishme për bartësit e politikave: "Produktiviteti dhe dalja e kompanive gjatë Kovid-19: Analizë nga më shumë vende", nga Silvia Muçi, Filip Jolevski, Kohei Ueda dhe Domenico Viganola dhe "Analizë e vendeve të punës online dhe kërkesa për profesione dhe aftësi në Republikën e Maqedonisë së Veriut", nga Aleksandar Kostadinov.

Punimi i parë, i paraqitur nga Filip Jolevski, është shtesë e literaturës mbi efektet e pandemisë Kovid-19 në mbijetesën e kompanive në kohë krize, përmes panel hulumtimit duke përdorur mikro të dhëna. Materiali ofron përgjigje të pyetjes nëse në krizën aktuale është vërtetuar teoria e Schumpeter për dëbim nga tregu të kompanive më pak produktive. Për më tepër, analiza përpiqet të identifikojë faktorët që ndikojnë në përshtatshmërinë më të madhe të kompanive, si dhe gjasat më të mëdha për mbijetesë të tyre, të tilla si inovacioni, digjitalizimi dhe mjedis i favorshëm biznesi. Kështu, siç u theksua në sesion, ky hulumtim ofron njohuri interesante dhe të dobishme për bartësit e politikave, në afat të shkurtër, veçanërisht në këtë periudhë kur qëllimi i të gjitha politikave është të ofrojë mbështetje për kompanitë e qëndrueshme dhe kështu të shmangë të ashtuquajturin zombifikim të sektorit të korporatave.

Gjatë prezentimit, Jolevski tha se duke përdorur mikro të dhëna në nivel të kompanive për 31 ekonomi, në analizë u arrit në përfundim se kompanitë më pak produktive kanë më pak gjasa të mbijetojnë gjatë krizës. Jolevski prezantoi gjithashtu tezën e marrëdhënies së fortë dhe negative midis mbylljes së kompanive dhe digjitalizimit dhe inovacionit të tyre, e cila ashtu siç theksoi është veçanërisht e rëndësishme për kompanitë më të vogla, duke vërtetuar rëndësinë e përshtatjes me ndryshimet e tregut si faktor për mbijetesë të kompanive. Analiza tregon se ekziston lidhje negative midis mbijetesës së kompanive dhe klimës së vështirë të biznesit, si dhe midis mbylljes së kompanive dhe kohëzgjatjes së ekzistencës së tyre.

Punimi i dytë i paraqitur, "Analiza e vendeve të punës online dhe kërkesa për profesione dhe aftësi në Republikën e Maqedonisë së Veriut" nga Aleksandar Kostadinov, trajton aplikimin e teknologjive të reja për qëllime analitike, si një trend aktual, modern në punën shkencoro-hulumtese, të cilat ofrojnë mbledhje relativisht të shpejtë dhe të lehtë të të dhënave nga burime të ndryshme jo-tradicionale, regjistrim të grupeve të mëdha të të dhënave në kohë reale, sistematizim dhe përpunim të tyre. Më konkretisht, këto teknologji dhe mjete të reja aplikohen në analizën e tregut të punës, në mënyrë që të kuptohet më mirë situata në fushën e kërkesës për profesione, duke përdorur burime alternative të të dhënave, të tilla si informacion i disponueshëm publikisht dhe të dhëna nga portalet e internetit, duke ofruar zgjidhje të reja në sigurimin e informacionit në kohë për këtë segment të rëndësishëm të tregut.

Siç vuri në dukje edhe Kostadinov në prezantim, në hulumtimin e tij janë analizuar kërkesa për profesione nga më shumë se 6,000 njoftime për punë përmes internetit (NjPI) të botuara në një nga portalet e njohura për punë në vend, të grumbulluara në periudhë njëvjeçare, pas së cilës përpunohen dhe kategorizohen sipas klasifikimit ISCO-08. Duke përdorur mjetet e mësimit makinerik për analizë të tekstit, zgjerohet klasifikimi i aftësive dhe kualifikimeve të cilat i kërkojnë punëdhenësit në NjPI-të e mbledhura.

Pas prezantimeve, pati një interes jashtëzakonisht të madh për diskutim nga pjesëmarrësit në session, në të cilin u hapën çështje relevante të nxitura nga hulumtimi i Jolevskit dhe Kostadinov.

Sesioni i ardhshëm i Klubit të Hulumtuesve do të mbahet në dhjetor dhe Banka Popullore do të shpallë thirrje të re për hulumtuesit për të prezentuar punime në sesion.