Shkup, 17 mars 2022
Këtë vit festojmë 30 vjet të sovranitetit monetar. 30 vite më parë, më 26 prill, u hodhën themelet e pavarësisë monetare: u prezantua denari si monedhë vendase, që zëvendësoi dinarin jugosllav të atëhershëm, ndërsa Banka Popullore filloi të funksionojë si bankë qendrore e pavarur. Me këtë u rrumbullakësua plotësisht pavarësia e vendit tonë.
Që atëherë, ndër vite, ekipet e Bankës Popullore kanë punuar me shumë përkushtim, sakrificë dhe vizion për të ndërtuar atë që kemi sot - monedhë vendase të qëndrueshme dhe bankë qendrore moderne, të pavarur, të besueshme dhe të njohur ndërkombëtarisht. Gjatë rrugëtimit të tij, institucioni u përball me një sërë sfidash, si në aspektin e zbatimit të reformave të rëndësishme të orientuara drejt tregut në sistemin bankar, ashtu edhe në aspektin e përballjes së goditjeve të natyrave të ndryshme. Në të gjitha ato situata u arritën qëllimet themelore të funksionimit të Bankës Popullore.
Vitet e fundit, Banka Popullore ka marrë një sërë mirënjohjesh nga institucione ndërkombëtare si për funksionimin e saj ashtu edhe për politikat të cilat i zbaton.
30 vitet e kaluara të punës të suksesshëm të Bankës Popullore janë garantim se në periudhën e ardhshme do të kemi kapacitet për t'u përballur me sfidat e krijuara nga situata vijuese. Vazhdojmë ta ruajmë qëndrueshmërinë e denarit, si nga kërcënimet ekonomike ashtu edhe nga ato joekonomike – nga spekulimet dhe lajme të rreme, të cilat janë po aq të rrezikshme.
Duke ruajtur stabilitetin e denarit dhe stabilitetin financiar, njëkohësisht jemi të orientuar drejt së ardhmes, duke ndjekur shembullin e bankave qendrore më të mëdha. Aktivitetet tona të ardhshme synojnë të mundësojnë krijimin e shërbimeve bankare më të mira dhe më të lira përmes fintekut, duke pasur parasysh sigurinë kibernetike. Më tutje, angazhimi ynë është në drejtimin e financave të gjelbra, sepse të gjithë politikëbërësit duhet të jenë të vetëdijshëm se ndryshimet klimatike do të jenë një nga kërcënimet më të mëdha të shekullit të 21-të.
Me qëllim të shënimit të këtij jubileu të rëndësishëm kombëtar, Banka Popullore planifikon disa manifestime, duke përfshirë edhe atë kryesorin- Akademinë Solemne me Rastin e Jubileut dhe Konferencën Kërkimore të Bankës Popullore, e cila këtë vit do të organizohet në bashkëpunim me Bankën Evropiane të Investimeve (BEI), ku do të marrin pjesë guvernatorë dhe viceguvernatorë nga bankat qendrore nga rajoni si dhe Europa, përfaqësues të organizatave financiare ndërkombëtare, komuniteti shkencor dhe sektori bankar.