Mbahet mbledhja e rregullt e Komitetit për Politikë Operative Monetare të Bankës Popullore
Shkup, 16 shkurt 2022
Më 15 shkurt 2022 u mbajt mbledhja e rregullt e Komitetit për Politikë Operative Monetare të Bankës Popullore, në të cilën u shqyrtuan treguesit kryesorë të ekonomisë të vendit si dhe zhvillimet në tregjet financiare ndërkombëtare dhe të vendit, në kontekstin e pozicionimit të politikës monetare.
Bazuar në vlerësimin e treguesve më të fundit si dhe të mjedisit të politikës monetare, u vendos që norma bazë e interesit të mbetet e pandryshueshme, në nivel prej 1,25%, ndërsa në ankandin e bonove të thesarit të ofrohen bono në vlerë të pandryshuar prej 10 miliardë denarë. Në mbledhjen e Komitetit u konfirmua se është e nevojshme vigjilencë dhe monitorim i vazhdueshëm i treguesve, dhe në kuadër të nevojës për ndryshime të qëndrimit të politikës monetare. Gjatë vendimmarrjeve, Banka Popullore posaçërisht merr parasysh lëvizjet e rezervave valutore dhe inflacionin.
Rezervat devizore janë në zonë të sigurtë, dhe ecuritë e janarit janë brenda pritshmërive për tremujorin e parë të vitit 2022. Lidhur me faktorët që ndikojnë në rezervat valutore, të dhënat e tregut të këmbimit të muajit janar 2022, nuk ka devijim të ndjeshëm nga projeksioni i muajit tetor, ndërsa tregojnë rritje të mëtejshme vjetore të blerjes neto të valutës. Të dhënat për tregtinë e jashtme për tremujorin e katërt 2021 tregojnë për një deficit tregtar pak më të lartë krahasuar me pritjet me projeksionin e tetorit.
Në janar 2022, u realizua norma vjetore e inflacionit prej 6,7%. Përshpejtimi i dinamikës vjetore të inflacionit është rezultat i rritjes së çmimeve të rregulluara të energjisë, si dhe rritja te disa produkte ushqimore të cilat kanë dinamikë të ndryshueshme. Prurjet e inflacionit bazë (duke përjashtuar ndikimin e çmimeve të ushqimeve dhe të energjisë) në rritjen e çmimeve mbetet i moderuar dhe i qëndrueshëm. Prandaj, presionet e çmimeve mbeten kryesisht për shkak të faktorëve të ofertës që lidhen me ndryshimet në çmimet në tregjet globale dhe ndikimin e pandemisë. Inflacioni i realizuar është mbi projeksionin dhe pritshmëritë për dinamikën e ardhshme të çmimeve të importit janë korrigjuar në drejtim rritës. Megjithatë, institucionet ndërkombëtare presin stabilizim të rritjes së këtyre çmimeve në gjysmën e dytë të vitit dhe si rrjedhojë ulje të presioneve inflacioniste. Pasiguria në lidhje me ndryshimet e çmimeve mbetet e lartë, në pajtim me efektet e pasigurta ekonomike lidhur me zhvillimin dhe ballafaqimin e pandemisë dhe tensioneve aktuale gjeopolitike.
Banka Popullore i monitoron nga afër të gjitha ndryshimet dhe nëse rritja e çmimit është e një natyre të zgjatur dhe ndikon ndjeshëm në pritjet inflacioniste, mbetet në gatishmëri për të reagim të duhur me instrumentet të cilat disponon.
Përsa i përket lëvizjeve në ekonominë reale, mesatarisht, në tre tremujorët e parë të vitit 2021, ekonomia shënoi rritje reale prej 4.6% që është pranë pritshmërisë së Bankës Popullore nga projeksioni i tetorit. Të dhënat e disponueshme me frekuencë të lartë për tremujorin e katërt të 2021, tregojnë për rritje të mëtejshme vjetore të aktivitetit ekonomik, por, me dinamikë më të ngadaltë krahasuar me dy tremujorët e mëparshëm. Të dhënat për këtë periudhë tregojnë ritme të larta, por, të moderuara të rritjes vjetore të qarkullimit të përgjithshëm tregtar dhe hotelierik si dhe ngadalësim të rënies së prodhimit industrial, dhe në punimet e kryera ndërtimore në periudhën tetor-nëntor shënohet rënie e mëtejshme vjetore.
Rimëkëmbja e ekonomisë mbështetet nga lëvizjet solide në sektorin monetar. Sipas të dhënave paraprake për muajin janar 2022, rritja solide e depozitave dhe e kredive vazhdon, me dinamikë më të fortë se sa ishte parashikuar për tremujorin e parë të vitit 2022.
Në përgjithësi, në mbledhje të Komitetit u konstatua se zhvillimet dhe rreziqet e mëtejshme të pandemisë e shkaktuar nga kovid-19 si dhe nga tensionet aktuale gjeopolitike dhe efektet e tyre parasegjithash në rritjen e çmimeve globale, mbeten të pranishme, që kërkon monitorim vigjilent të situatës, megjithëse për momentin treguesit makroekonomikë janë përgjithësisht në pajtueshmëri me pritshmëritë. FED-i dhe BQE-ja, si banka qendrore të cilat kanë ndikim të rëndësishëm në tregjet financiare globale, edhe pse akoma nuk e kanë rritur normën bazë të interesit, përmes një komunikimi tregojnë për një shtrëngim të mundshëm më të shpejtë të kushteve financiare botërore nga sa pritej. Banka Popullore, si më parë, ashtu edhe në periudhën e ardhshme, do të monitorojë nga afër trendet, rreziqet dhe ndryshimet në kushtet globale dhe mbetet në gatishmëri për përgjigjen e duhur përmes mjeteve në dispozicion.