Shkup, 15 tetor 2021 

FMN, në parashikimet e paraqitura në Perspektiva Ekonomike Botërore, pret që inflacioni të arrijë një mesatare prej 3.1% në vitin 2021 dhe do të zvogëlohet afër 2.2% në vitin 2022. Siç u theksua në takim, lëvizjet aktuale të çmimeve në Maqedoninë e Veriut janë në përputhje me zhvillimet globale. Nxitësi më i madh i rritjes së fundit të inflacionit janë çmimet globale të energjisë, veçanërisht të naftës dhe gazit. Në të njëjtën kohë, ndërprerjet në zinxhirët global të furnizimit dhe mbingarkesa po bëjnë presion mbi çmimet e mallrave të qëndrueshëm të konsumit, veçanërisht pas rimëkëmbjes së shpejtë të kërkesës. Efekti i çmimeve më të larta të energjisë dhe mospërputhja midis ofertës dhe kërkesës pritet të mbaroj në vitin 2022. Për më tepër, asnjë nga këta faktorë nuk do të reagojë ndaj ndryshimeve në politikën monetare. Megjithatë, bankat qendrore, përfshirë edhe Bankën Popullore, do të duhet të monitorojnë me kujdes zhvillimet për tu siguruar se pritshmëritë më të larta të mundshme për inflacionin nuk do të shkaktojnë rritje të zgjatur të pagave.

Me politikën e lehtësuar monetare, si dhe me të gjitha vendimet dhe masat e ndërmara që nga shpërthimi i krizës së koronës, Banka Popullore kontribuon dukshëm në mbështetjen e stabilitetit financiar dhe ekonomisë maqedonase në tërësi. Pozicionimi i politikës monetare është i përshtatshëm tani për tani. Megjithatë, është e nevojshme të monitorohen me kujdes lëvizjet e inflacionit, dhe veçanërisht pritjet e inflacionit dhe efektet e mundshme të transmetuara në kontekstin e rritjes së pagave.

Kjo u tha nga guvernatorja Anita Angelovska-Bezhoska në takimin me ekipin e Departamentit për Evropën në Fondin Monetar Ndërkombëtar (FMN), të udhëhequr nga kreu i misionit, Bergliot Barkbu. Takimi u zhvillua në kuadër të Takimeve Vjetore të FMN-së dhe Bankës Botërore.

Siç theksoi guvernatorja në takim, Banka Popullore po ndjek nga afër zhvillimet në ekonominë maqedonase. Meqenëse pasiguria është ende e pranishme, Banka Popullore është e gatshme t'u përgjigjet në mënyrë adekuate zhvillimeve, brenda kompetencave të saj dhe të komunikojë vendimet e saj në mënyrë transparente.