Shkup, 15 janar 2021  

„Niveli i lartë i rezervave valutore të akumuluara në periudhën para pandemisë i mundësoi Bankës Popullore të reagojë në kohë dhe me guxim përmes uljes së normës bazë të interesit, duke injektuar likuiditet shtesë në sistem dhe duke lehtësuar rregulloren bankare. Kjo çoi në një mbështetje të qëndrueshme kreditore të kompanive dhe amvisërive, e cila në fakt është përshpejtuar në krahasim me vitin e kaluar, si dhe ulje të mëtejshme të normave të interesit në nivele historikisht më të ulëta.“ Kjo u theksua nga guvernatorja e Bankës Popullore, Anita Angelovska-Bezhoska, në një nga ngjarjet kryesuese tradicionale financiare - Forumi i Evropës Qendrore dhe Lindore, e organizuar nga „Euromoney“, në panel sesionin në të cilin morën pjesë disa guvernatorë të Evropës Qendrore dhe Juglindore (EQJ). 

Në këtë kontekst, ajo gjithashtu theksoi se për zbatimin e një politike të lehtësuar monetare kontribuon edhe repo linja në vlerë prej 400 milionë eurosh, të cilën në kërkesë të Bankës Popullore për herë të parë e miratoi Banka Qendrore Evropiane. Instrumenti i këtillë është i rëndësishëm sepse mundëson qasje të shpejtë në likuiditet në valutë të huaj edhe në kushte të pasigurisë së lartë dhe ndërprerjeve të mundshme më të mëdha në tregjet ndërkombëtare për shkak të goditjes së Kovid-19.

Ajo gjithashtu foli edhe për rolin dhe mandatin e bankave qendrore. Duke bërë këtë ajo vuri në dukje se, bazuar në përvojat nga kriza ekonomike globale në korniza ndërkombëtare, po rishikohen disa nga pikëpamjet tradicionale lidhur me qëllimet, strategjitë dhe instrumentet e bankave qendrore.  Për këtë kontribuojnë ndryshimet strukturore në ekonomitë që dalin nga pandemia. Ajo që, sipas saj, po ndryshon rrënjësisht është sjellja e amvisërive dhe bizneseve, dhe në të njëjtën kohë ekziston edhe një ngadalësim i mundshëm në procesin e globalizimit, si dhe përshpejtim në dixhitalizimin e ekonomive. E gjithë kjo imponon nevojën për të rivlerësuar lidhjet në ekonomi dhe mekanizmin e transmetimit të politikës monetare, me qëllim rregullimin e duhur të instrumenteve dhe politikave.

Forumi gjithashtu adresoi edhe çështje tjera të rëndësishme për ekonomitë e EQJ-së, me vëmendje të veçantë mbi ndikimin e pandemisë në të ardhmen e këtyre ekonomive. Në ngjarje rregullisht marrin pjesë një numër i madh pjesëmarrësish: guvernatorë të bankave qendrore, ministra të financave, udhëheqës të institucioneve financiare dhe investitorë, të cilët bisedojnë për sfidat kryesore të politikëbërësve dhe ekonomive në Evropën Qendrore dhe Lindore, ndërsa këtë vit me theks të veçantë për sfidat që dalin nga pandemia. Duke pasur parasysh numrin e madhe të pjesëmarrësve, ky forum tradicional i organizuar nga „Euromoney“ llogaritet si një ngjarje e rrallë e këtij lloji në të cilën ekspertët e njohur të tregjeve financiare dhe politikëbërësit kanë mundësi të debatojnë dhe të analizojnë të ardhmen ekonomike në rajonin e EQJ-së. Gjatë Forumit të EQJ-së, guvernatorja Anita Angelovska-Bezhoska, e shoqëruar nga anëtarë tjerë të Bankës Popullore, zhvilloi një takim virtual me përfaqësues të institucioneve tjera financiare kryesore.