Shkup, 14 tetor 2021 

Pavarësia dhe profesionalizmi i bankës qendrore janë thelbësore për ruajtjen e stabilitetit makroekonomik dhe financiar. Në takimin midis guvernatores së Bankës Popullore, Anita Angelovska-Bezhoska dhe ambasadores së Shteteve të Bashkuara të Amerikës në vend, Kate Marie Burns, u bisedua për kontributin e autoriteteve monetare në përgjigjen ndaj krizës së shkaktuar nga Kovid-19. U theksua se masat e marra nga Banka Popullore kontribuan ndjeshëm në stimulimin e aktivitetit ekonomik, si dhe në ruajtjen e stabilitetit financiar gjatë krizës.

Guvernatorja njoftoi se është duke u zhvilluar cikli i ri i parashikimeve makroekonomike, për të cilat banka qendrore do të informojë në fillim të muajit nëntor. Më pas, ajo vuri në dukje se arritjet e deritanishme në produktin e brendshëm bruto janë kryesisht në përputhje me parashikimet e Bankës Popullore. Rezervat valutore janë pak më të mira nga sa pritej, gjithashtu edhe mbështetja kreditore.

Inflacioni është mesatarisht më i lartë. Lëvizjet inflatore janë kryesisht për shkak të presioneve të importit të lidhura me çmimet globale të energjisë dhe ushqimit. Megjithatë, Banka Popullore do të vazhdojë të monitorojë me kujdes lëvizjet e çmimeve, veçanërisht pritjet e inflacionit dhe efektet anësore të mundshme dhe do të përgjigjet në përputhje me rrethanat.

Guvernatorja gjithashtu theksoi se rimëkëmbja graduale e ekonomisë, e cila është e vazhdueshme, kontribuon pozitivisht në ruajtjen e stabilitetit makroekonomik dhe financiar dhe zbut rreziqet sistemike. Sidoqoftë, natyra e pasigurt e krizës së koronës imponon nevojën për gatishmëri të vazhdueshme dhe monitorim vigjilent të situatës, në mënyrë që të merren masat e duhura për t'u përballuar me sfidat.

Në takim morën pjesë gjithashtu edhe shefi i çështjeve ekonomike dhe politike në Ambasadën Amerikane, Christopher Zimmer, si dhe Jordan Damçevski, ekonomist i lartë në Ambasadën Amerikane në vend.