Shkup, 13 korrik 2021 

Në kuadër të Programit rajonal për forcimin e kapaciteteve institucionale të Bankave Qendrore të Ballkanit Perëndimor për integrimin e tyre në Sistemin Evropian të Bankave Qendrore (ESCB), në bashkëpunim me Bankën e Portugalisë, është sjellur masa e dytë nga dy masat bilaterale për pajtueshmëri dhe harmonizim të mëtejshëm me kërkesat statistikore të Sistemit Evropian të Bankave Qendrore.

Qëllimi kryesor i kësaj mase bilaterale është shkëmbimi i përvojave me Bankën e Portugalisë në procesin e zbatimit të Projektit për sistemin e integruar të raportimit bankar (ISIDORA) për qëllime statistikore dhe mbikëqyrëse. Në kuadër të këtij bashkëpunimi do të diskutohet rreth monitorimit të detajuar të kërkesave të BQE-së në lidhje me statistikat e bilancit, statistikat e mbajtësve të letrave me vlerë dhe të dhënave të grumbulluara për kredi. Transmetimi i njohurive dhe praktikave më të mira të Bankës së Portugalisë në procesin e integrimit të kërkesave statistikore do të ndihmojë në procesin e hartimit të një sistemi të ri raportimi, i cili do të sigurojë pajtueshmëri të mëtejshme me kërkesat statistikore dhe njëkohësisht do të ndihmojë në standardizimin e kërkesave të raportimit, uljen e raportimit të shumëfishtë të të dhënave dhe minimizimin e barrës mbi reporterët.

Programi rajonal i financuar nga BE për forcimin e kapaciteteve institucionale të Bankave Qendrore të Ballkanit Perëndimor u prezantua në Mars 2019, në bashkëpunim me “Deutsche Bundesbank” si koordinator i programit dhe nëntëmbëdhjetë bankave të tjera qendrore nga Sistemi Evropian i Bankave Qendrore (ESCB) dhe Bankën Qendrore Evropiane (BQE), dhe do të zbatohet deri në fund të vitit 2021. Programi rajonal i trajnimit përfshin çështjet kryesore në fushën e bankës qendrore dhe mbikëqyrjes. Bashkimi Evropian (BE) ka caktuar 2 milion euro për programin rajonal nga Instrumenti  për asistencë Para-Anëtarësimit (IPA II).