Shkup, 9 prill 2022
Dërgesat nga jashtë janë kthyer në nivelet e para krizës, me rritje vjetore prej 44% vitin e kaluar. Ato janë potencial shumë i rëndësishëm valutor i ekonomisë tonë, por edhe burim financimi i konsumit të amvisërisë. Sipas anketave të Bankës Popullore, rreth dy të tretat e dërgesave të jashtme përdoren për financimin e konsumit personal, theksoi guvernatorja e Bankës Popullore, Anita Angellovska-Bezhoska në paraqitjen e saj si e ftuar në emisionin “Top Tema”.
“Dërgesat janë kanali në të cilin shohim efekte në çdo episod krize. Gjatë pandemisë ka pasur rënie të ndjeshme. Ato u ulën me rreth 24%, ose nominalisht rreth 400 milionë euro, që në të vërtet është një shumë e konsiderueshme për ekonominë tonë. Mbyllja e ekonomive, kufizimet e udhëtimeve, përkeqësimi i kushteve të tregut të punës në pjesën ku jetojnë emigrantë, të ardhura më të ulëta të disponueshme dhe më pak mundësi për të dërguar fonde, kanë pasur ndikimin e tyre. “Nga ana tjetër, më gëzon fakti se vitin e kaluar ky trend shënoi përmirësim të dukshëm, me rritje vjetore prej 44% të dërgesave të jashtme, e cila tashmë është kthyer në nivelet e para krizës”, tha guvernatorja. Sa i përket depozitave, guvernatorja thekson se ndjehet presioni si në çdo krizë, por të dhënat e fundit që disponojmë për muajin shkurt tregojnë rritje të depozitave të amvisërive.
“Si në çdo episod krize, edhe në këtë, ka gjithmonë presion mbi bazën e depozitave të bankave. Ky presion ishte i pranishëm pas përshkallëzimit të konfliktit të 24 shkurtit dhe vazhdoi në gjysmën e parë të marsit. Sidoqoftë, tashmë në gjysmën e dytë të marsit dhe në fillim të këtij muaji vërehen tendenca më të qëndrueshme. Megjithatë, nëse e shohim shkurtin si një muaj të tërë, depozitat e qytetarëve shënuan rritje. Nuk kemi ende të dhëna përfundimtare për muajin mars, ndërkaq të dhënat paraprake tregojnë se mund të ketë ulje të caktuar të depozitave të qytetarëve, megjithëse tërheqja e depozitave është relativisht më e vogël në krahasim me episodet e tjera të krizës që kemi parë, për shembull ato të 2001-shit apo 2016-tës”, thotë guvernatorja. Për sa i përket kreditimit, guvernatorja thekson se të dhënat e fundit flasin për rritje solide të kredisë, e cila është veçanërisht e theksuar në sektorin e korporatave, ku ka një përshpejtim të kreditimit.
“Të dhënat e fundit të disponueshme nga shkurti i këtij viti tregojnë për një rritje solide të kredisë prej rreth 9% dhe ajo që duhet theksuar është përshpejtimi i mbështetjes kreditore për sektorin e korporatave, i cili në periudhën para krizës dhe në vitin e parë pandemik ishte mjaft e dobët, rreth 1% ose 2% rritje e kredisë. Tani te ndërmarrjet arrin 10% . Ka ngadalësim të moderuar të popullsisë dhe shifrat e fundit tregojnë një rritje të kredisë prej rreth 8 për qind”, theksoi Angellovska-Bezoska.