Shkup, 7 shtator 2021
Një nga mësimet e nxjerra nga kriza e madhe financiare e vitit 2008/9 është se nuk duhet të ndërprehet para kohe mbështetja për ekonominë nga bartësit e politikave, përfshirë edhe bankat qendrore, derisa të arrihet ritëm solid dhe i qëndrueshëm i rimëkëmbjes dhe rritjes ekonomike. Rimëkëmbja nga goditjet e deritanishme nga kriza e koronës edhe më tej vazhdon, por pasiguria në lidhje me pandeminë dhe ndikimin e saj në dinamikën e rimëkëmbjes ekonomike ende ekziston dhe nevojitet mbështetja e mëtejshme nga bartësit e politikave. Duke përdorur hapësirën e disponueshme për stimul monetar, Banka Popullore do të vazhdojë të ndjekë politikë monetare të lehtësuar, duke mbështetur kështu ekonominë maqedonase në rimëkëmbjen e saj.
Kjo u cek nga guvernatorja e Bankës Popullore, Anita Angelovska-Bezhoska, në panelin e djeshëm me temë diskutimi "Politikat makroekonomike dhe financat publike në periudhën post-pandemike", në Konferencën e parë vjetore të Ministrisë së financave. "Rimëkëmbja dhe rritja ekonomike pas kovid-krizës”, në kuadër të Forumit Ekonomik dhe Financiar.
Në diskutim, guvernatorja theksoi se, megjithatë, hapësira për të ndjekur politikë monetare të lehtësuar nuk është e pakufizuar dhe se në përgjithësi, bankat qendrore duhet të jenë gjithmonë të vetëdijshme për efektet anësore të mundshme dhe rreziqet e një periudhe shumë të gjatë të lehtësimit të pozicionimit monetar.
"Shkurtimisht, edhe pse politika monetare jep stimul shtesë për ekonominë, për të arritur efekte pozitive afatgjata, është e nevojshme t'i kushtohet vëmendje si politikave strukturore ashtu edhe atyre transformuese, të cilat janë kyçe për rritjen e potencialit të rritjes," tha Angelovska-Bezhoska. Lidhur me politikën monetare të përcaktuar, ajo theksoi se duke pasur parasysh strategjinë monetare për kursin fiks të këmbimit de fakto, hapësira për rregullimin e politikës varet kryesisht nga dy faktorëkryesorë: rezervat zyrtare të këmbimit valutor dhe stabiliteti i çmimeve. Gjithashtu iu referua edhe situatës aktuale, ku ndër të tjera vuri në dukje se sipas të gjitha standardeve, rezervat valutore mbeten të përshtatshme për stabilitetin e kursit të këmbimit të denarit kundrejt euros.
Në panelin e diskutimit, të kryesuar nga shefi i Departamentit për ekonomi, ndërtimin e institucioneve dhe bashkëpunimin ndërkufitar të Delegacionit të BE-së, Frank Janmat, guvernatorja Angelovska-Bezhoska foli më hollësisht rreth masave të Bankës Popullore dhe efektet e tyre nga paraqitja e krizës, si dhe gjendjen e sistemit bankar sipas indikatorëve të fundit. Ajo theksoi se indikatorët tregojnë hapësirë për mbështetje të mëtejshme të kredisë për ekonominë nga sektori bankar, gjatë së cilës natyrisht duhet të meret parasysh edhe nevoja për kujdesin ndaj tij.
Përveç guvernatores Anita Angelovska-Bezhoska, në panelin diskutues morën pjesë ministri i financave, Fatmir Besimi, drejtori i departamentit të FMN-së për Europë, Alfred Kamer, drejtori rajonal i Bankës Botërore për Ballkanin Perëndimor, Linda van Gelder, ministrat e financës të Republikës së Kosovës dhe Shqipërisë, Hekuran Murati dhe Anila Denaj dhe kryetari i Komisionit për financa dhe buxhet në kuvendin e RMV, Timqo Mucunski.