Shkup, 7 mars 2023

Komiteti për Stabilitet Financiar, në mbledhjen e mbajtur më 6 mars 2023, ka miratuar Raportin Vjetor për punën e Komitetit për vitin 2022. Raporti Vjetor thekson se sistemi financiar në vend është i qëndrueshëm, pavarësisht tensioneve të mëtejshme gjeopolitike nga pushtimi ushtarak rus në Ukrainë, si dhe sfidave globale që lidhen me krizën energjetike dhe normat e larta të inflacionit. Megjithatë, në kushtet e rritjes së pasigurisë, theksohet edhe më shumë nevoja për vlerësim të plotë të rrezikut, menaxhim të duhur të rrezikut dhe ndërtim të mëtejshëm të kapitalit për të siguruar kapacitet më të madh të institucioneve financiare për të absorbuar rreziqet.

Në raport theksohet gjithashtu se Banka Popullore në dhjetor 2022 ka bërë ndryshim në masat makroprudenciale, respektivisht ka rritur normën e shtresës mbrojtëse kundërciklike të kapitalit për ekspozimet e bankave ndaj klientëve në ekonominë vendase. Edhe pse tani për tani nuk ka shenja të realizimit të rrezikut të kredisë në bilancet e bankave, me rritjen e normës së shtresës mbrojtëse kundërciklike të kapitalit vepron në mënyrë parandaluese, d.m.th. kontribuon në forcimin e mëtejshëm të fuqisë kapitale të bankave vendase, duke forcuar në këtë mënyrë stabilitetin dhe rezistencën e sistemit bankar dhe në këtë mënyrë edhe stabilitetin e përgjithshëm financiar.

Me hyrjen në fuqi të Ligjit për Stabilitet Financiar, u vendos korniza ligjore për zbatimin e politikës makroprudenciale në Republikën e Maqedonisë së Veriut. Komiteti për Stabilitet Financiar, nga ana tjetër, është themeluar si një organ ndërinstitucional përgjegjës për monitorimin e zbatimit të politikës makroprudenciale në vend dhe për koordinimin e aktiviteteve në përcaktimin dhe monitorimin e rreziqeve sistemike në segmente të veçanta të sistemit financiar, në ndërmarrjen e masave makroprudenciale dhe në përgatitjen dhe menaxhimin me krizën financiare. Me Ligjin për Stabilitet Financiar u ndahen kompetenca të qarta rregullatorëve të sistemit financiar për të ndërmarrë masa makroprudenciale që synojnë uljen e cenueshmërisë dhe rritjen e rezistencës të segmenteve të veçanta të sistemit financiar për të cilin ata janë përgjegjës. Në këtë mënyrë, rregullatorët kompetentë, veçmas dhe së bashku përmes punës së Komitetit për Stabilitet Financiar, kontribuojnë në arritjen dhe ruajtjen e stabilitetit financiar.

Komiteti përbëhet nga të gjithë rregullatorët e sistemit financiar në vend, përkatësisht Banka Popullore, Ministria e Financave, Komisioni për Letrat me Vlerë, Agjencia për Mbikëqyrjen e Financimit Kapital të Sigurimit Pensional dhe Agjencia për Mbikëqyrjen e Sigurimit. Komitetin e kryeson guvernatori i Bankës Popullore, ndërsa në kushtet e krizës financiare mund ta kryesojë edhe ministri i Financave, nëse kështu vendos guvernatori dhe ministri. Një strukturë e tillë mundëson zbatimin e vazhdueshëm të rekomandimeve të Bordit Evropian për sigurimin e një mekanizmi efikas të bashkëpunimit ndërmjet të gjitha institucioneve me kompetenca në fushën e sistemit financiar.