Shkup, 7 shkurt 2023 

Bankat komerciale, në përputhje me rregulloren ekzistuese ligjore të Ligjit për Parandalimin e Pastrimit të Parave dhe Financimit të Terrorizmit, Ligjit për Mbrojtjen e të Dhënave Personale, si dhe rregulloren nënligjore, duhet t'i përditësojnë rregullisht të dhënat personale të klientëve. Në kushtet moderne ku shërbimet bankare elektronike dhe mobile përdoren gjithnjë e më shpeshë, në përputhje me dispozitat ligjore për mbrojtjen e të dhënave personale dhe sigurinë e pagesave, është e domosdoshme bankat të mbajnë komunikim të rregullt me ​​klientët, me qëllim të realizimit të sigurt të shërbimeve dhe mbrojtjes së përdoruesve të produkteve dhe shërbimeve financiare.

Bankat duhet të vertetojnë identitetin e klientit ose pronarit të vërtetë gjatë vendosjes së marrëdhënies afariste. Çdo bankë, me akt të brendshëm, përcakton frekuencën e përditësimit të dokumenteve dhe të dhënave të nevojshme për ndjekjen e marrëdhënies afariste me klientët. Kur ndryshon ndonjë nga të dhënat personale (adresa, letërnjoftim i ri, etj.), klienti është i detyruar përkatësisht të njoftojë bankën shërbimet e së cilës i përdor.

Bankat duhet t'i informojnë qytetarët për mënyrën më të thjeshtë, më të lehtë dhe më të shpejtë me të cilën mund të përditësojnë të dhënat e tyre personale, si dhe sa shpesh duhet të përditësojnë të dhënat e tyre personale në bankë (edhe kur nuk ka ndryshim në të dhënat). Në disa banka ekziston mundësia që përditësimi i të dhënave të kryhet në mënyrë elektronike, pa ardhur në sportel.

Gjetja e mënyrave për njoftimin e risive në rregullore, si dhe komunikimi i rregullt me ​​klientët për të gjitha aspektet e përdorimit të shërbimeve nga sektori bankar, kontribuon në rritjen e besimit të qytetarëve në sektorin bankar, ndërsa me këtë reduktohet hapësira për spekulime dhe dezinformata që mund të prishin stabilitetin e sistemit bankar.