Prezantohet punimi hulumtues i punuar në kuadër të projektit të binjakëzimit „Forcimi i kapacitetit institucional të Bankës Popullore në rrugën drejt anëtarësimit të saj në SEBQ“ të financuar nga Bashkimi Evropian.

Shkup, 5 mars 2021

Banka Popullore është ndër bankat qendrore që investojnë në aktivitetin kërkimor dhe forcimin e vazhdueshëm të infrastrukturës analitike, duke siguruar kështu njohuri dhe analiza kërkimore të cilat mund dhe duhet të jenë kontribut shtesë në ndërtimin e duhur të politikave. Prandaj, njëri nga komponentët në kuadër të projektit të binjakëzimit „Forcimi i kapacitetit institucional të Bankës Popullore në rrugën drejt anëtarësimit të saj në Sistemin Evropian të Bankave Qendrore“, të financuar nga Bashkimi Evropian i kushtohet njohurive dhe aftësive në analizën e politikave. Në kuadër të këtij projekti, i cili është në fazën përfundimtare të tij, ekspertë nga Banka Popullore, bashkë me ekspertin nga banak qendrore e Rumanisë, z. Mihai Kopaçu, punuan në studimin e lidhjes midis cikleve reale dhe financiare në ekonominë maqedonase, përmes aplikimit të një modeli dinamik stoastik të ekuilibrit të përgjithshëm (model DSGE) me euroizim të pjesshëm.

Sot, në kuadër të Sesionit të 38-të të Klubit të Hulumtuesve, para një numri të madh studiuesish-ekonomistësh nga vendi, si dhe para studentëve të institucioneve të arsimit të lartë, u prezantua punimi i Mihai Kopaçu, Joana Maxhoska dhe Mite Miteskit, i cili është rezultati i këtij hulumtimi. Pas fjalës hyrëse të viceguvernatores Ana Mitreska, punimin me titull „Një model dinamik stoastik i ekuilibrit të përgjithshëm (model DSGE) me euroizim të pjesshëm: rasti i ekonomisë maqedonase“, në emër të autorëve e prezantuan Mite Miteski dhe Joana Maxhoska duke paraqitur gjetjet dhe konkluzionet e hulumtimit.

Në fillim, u theksua se në kuadër të këtij projekti për herë të parë është vendosur një model DSGE në të cilin janë inkorporuar fërkime financiare, dhe i cili në të njëjtën kohë është i përshtatur për specifikat e ekonomisë maqedonase - kurs fiks i këmbimit dhe euroizim i pjesshëm financiar. Në të njëjtën kohë, u theksua se për dallim nga modelet makroekonomike ekzistuese të cilët përdoren në Bankën Popullore, modeli i ri është më i përshtatshëm për bazat makroekonomike, në të cilat modelohen marrëdhëniet ndërmjet bankave, amvisërive, ndërmarrjeve, bankës qendrore dhe qeverisë. Duke bërë këtë, në krahasim me modelin makroekonomik i cili aktualisht është në përdorim, u theksua se rezultatet e modelit DSGE janë të qëndrueshme, gjë që mundëson përdorimin e tij të mëtejshëm për qëllimet e analizës së politikave dhe është një bazë për azhurnimin e tij.

Në kuadër të materialit punues, i cili u prezantua, hollësisht është përshkruar struktura teorike e modelit, lidhjet makroekonomike, parametrat e vlerësuar që i përcaktojnë tiparet ciklike të modelit, si dhe metodat për vlerësim të modelit (funksione impuls-reagim, dekompozim i variancës dhe dekompozim historik i goditjeve).

Siç u theksua në prezantim, modeli mund të shërbejë si simulim përmes të cilit mund të monitorohet reagimi ndaj goditjeve të ndryshme dhe individuale, si dhe transmetimi i tyre në sektorët tjerë të ekonomisë.

Gjithashtu, para të pranishmëve në sesion u prezantuan përfundimet se zhvillimet në sektorin financiar u treguan veçanërisht të rëndësishëm për ndryshimet periodike makroekonomike në ekonominë maqedonase.

Në fund të prezantimit u theksua se kërkimi i bazuar në këtë model është i rëndësishëm për politikëbërësit sepse mundëson një analizë gjithëpërfshirëse të ciklit ekonomik në vendin tonë në 15 vitet e fundit.

Pas prezantimit të punimit, hulumtuesit që morën pjesë në sesion hapën një seri pyetjesh përkatëse të motivuara nga prezantimi, me ç’rast gjatë diskutimit u shkëmbyen më shumë opinione eksperte dhe u identifikuan sfidat e mëtejshme kërkimore. Në deklaratat e pjesëmarrësve u theksua se punimi i prezantuar, i cili është i pari i këtij lloji, do të jetë një referencë e rëndësishme për hulumtimet dhe analizat e mëtejshme për ndikimin e zhvillimeve në sektorin financiar mbi ekonominë dhe se ai ofron njohuri të rëndësishme për politikëbërësit.

Sesioni i ardhshëm i Klubit të Hulumtuesve do të mbahet në qershor.