Banka Qendrore Evropiane (BQE) mori vendim për vazhdimin e vlefshmërisë së repo linjës përmes së cilës vitin e kaluar, për herë të parë i mundësoi Bankës Popullore të ketë qasje të pandërprerë në likuiditet valutor në euro të siguruar nga kjo bankë qendrore. Gjegjësisht, afati i fundit për aplikimin e repo linjës në vlerë prej 400 milionë eurosh është vazhduar deri në mars të vitit 2022. Ky ndryshim mundëson mbështetje të konsiderueshme për Bankën Popullore nga BQE-ja, duke pasur parasysh se krijohet hapësirë shtesë për veprim të shpejtë dhe efikas nëse ka nevojë për zbutjen e efekteve të mundshme të Kovid krizës mbi ekonominë dhe tregjet financiare, duke pasur parasysh pasigurinë e krizës aktuale globale.

Në periudhën e deritanishme, Banka Popullore nuk ka përdorur fonde nga linja e miratuar repo, duke pasur parasysh ruajtjen e vazhdueshme të likuiditetit në denarë dhe valutor të sistemit bankar në një nivel të mjaftueshëm, me tendenca të dukshme për rritje të mëtejshme të fondeve likuide të bankave në disa muajt e fundit. Megjithatë, mbështetja e fituar likuide nga BQE-ja nënkupton edhe kapacitet të forcuar shtesë të bankës tonë qendrore për veprimet në drejtim të realizimit të qëllimeve dhe detyrave të saj, gjatë shtrëngimit të mundshëm të kushteve financiare në tregjet ndërkombëtare lidhur me Kovid krizën dhe rreziqet e saj negative mbi ekonominë globale. Pikërisht nëse ndodh ky skenar, ky instrument i BQE-së, i mundëson Bankës Popullore qasje të shpejtë në likuiditet në euro me kushte të favorshme të tregut, duke pasur parasysh se norma e interesit për këtë mbështetje likuide aktualisht është 0%.

Përparësi shtesë e repo linjës që BQE-ja ka miratuar për Bankën Popullore është fakti që ajo mundëson qasje më të thjeshtë në mjete valutore në euro, duke mos pasur nevojë që Banka Popullore t’i shesë në bazë të përhershme letrat me vlerë të cilat i ka në dispozicion në kushte më pak të favorshme të tregut në tregjet financiare ndërkombëtare. Nëse është e nevojshme, përdorimi i mjeteve nga repo linja mund të jetë gradual, deri në arritjen e shumës së paraparë maksimale.

Repo linja e miratuar nga BQE-ja është një vërtetim për gatishmërinë e Bankës Popullore në kuadër të kompetencave të saj që në mënyrën e duhur dhe në kohë të përgjigjet ndaj sfidave të krizës aktuale dhe me sukses të ruaj likuiditetin dhe stabilitetin makrofinanciar.

Banka Popullore falënderoi BQE-në për besimin dhe mbështetjen e dhënë duke vazhudar vlefshmërisë së kësaj linje.